عظمیٰ نیوز سروس
سرینگر //جموں کشمیر کی ادہم پور پارلیمانی نشست سمیت بھارت کی 28ریاستوں اور آٹھ مرکز کے زیر انتظام علاقوں میں پوری انتخامی مشینری لوک سبھا کے انتخابات کے لیے پوری طرح تیار ہے۔ سات مرحلوں میں ہونے والے لوک سبھا انتخابات آج 19 اپریل سے شروع ہورہے ہیں۔الیکشن کمیشن آف انڈیا نے کہا کہ کل 16.63 کروڑ ووٹر انتخابات میں حصہ لینے کے اہل ہیں۔مجموعی طور پر 1.87 لاکھ پولنگ اسٹیشن بنائے گئے ہیں، جب کہ 18 لاکھ اہلکاروں کو تعینات کیا گیا ہے۔ووٹرز میں 8.4 کروڑ مرد شامل ہیں۔ 8.23 کروڑ خواتین اور 11,371 تیسری صنف کے انتخاب کنندگان ہیں۔ 35.67 لاکھ پہلی بار ووٹ ڈالنے کے لیے رجسٹرڈ ہیں۔ اس کے علاوہ، 20-29 سال کی عمر کے گروپ میں 3.51 کروڑ نوجوان ووٹر ہیں۔کل 1625 امیدوار (مرد ) 1491 اور( خواتین)134 میدان میں ہیں۔پولنگ باڈی نے بتایا کہ پولنگ اور سیکورٹی اہلکاروں کو لے جانے کے لئے 41 ہیلی کاپٹر، 84 سپیشل ٹرینیں اور تقریباً 1 لاکھ گاڑیاں تعینات کی گئی ہیں۔تمام پولنگ سٹیشنوں میں مائیکرو آبزرور کی تعیناتی کے ساتھ 50 فیصد سے زائد پولنگ سٹیشنوں پر ویب کاسٹنگ کی جائے گی۔ 361 مبصرین (127 )جنرل مبصر، 67 پولیس مبصر، 167 اخراجات کے مبصرپہلے ہی اپنے انتخابی حلقوں میں پہنچ چکے ہیں۔انتخابات سے پہلے وہ کمیشن کی آنکھ اور کان کے طور پر کام کرتے ہیں تاکہ پوری طرح سے چوکس رہیں۔ مزید برآں، بعض ریاستوں میں خصوصی مبصرین کو تعینات کیا گیا ہے۔کل 4627 فلائنگ اسکواڈز، 5208 شماریات کی نگرانی کرنے والی ٹیمیں، 2028 ویڈیو سرویلنس ٹیمیں اور 1255 ویڈیو دیکھنے والی ٹیمیں چوبیس گھنٹے نگرانی کر رہی ہیں تاکہ ووٹرز کی کسی بھی قسم کی ترغیب سے سختی اور تیزی سے نمٹا جا سکے۔مجموعی طور پر 1374 بین ریاستی اور 162 بین الاقوامی سرحدی چیک پوسٹیں شراب، منشیات، نقدی اور مفت کے کسی بھی غیر قانونی بہا پر کڑی نظر رکھے ہوئے ہیں۔ سمندری اور فضائی راستوں پر سخت نگرانی رکھی گئی ہے۔
ادہم پور
ادھمپور پارلیمانی حلقہ میں کُل 16.23 لاکھ رائے دہندگان ہیں جن میں 8.45 لاکھ مرد اور 7.77 لاکھ خواتین شامل ہیں۔ کُل رائے دہندگان میں تقریباً 23,637 معذور اَفراد کے علاوہ 100 سال سے زیادہ عمر کے 403 افراد شامل ہیںجن کا اِنتخابی عمل میں حصہ لینے کے لئے اِندراج کیا گیا ہے۔ چیف الیکٹورل آفیسرجموںوکشمیر کے ایک بیان کے مطابق کٹھوعہ، اودھمپور، کشتواڑ، ڈوڈہ اور رام بن کے پانچ اَضلاع میں ہونے والے عام انتخابات کے پہلے مرحلے کے لئے تقریباً 2,637 پولنگ سٹیشن مکمل طور پر تیار ہیں۔ اِن میں سے 136 پولنگ سٹیشن پی 2 جبکہ 31 پولنگ سٹیشن پی 7 سے پی 3 زُمرے کے ہیں۔ اَضلاع میں کٹھوعہ میں بین الاقوامی سرحد کے ساتھ 25 پولنگ سٹیشن ہیں۔ مجموعی طور پر ریزرو سمیت 11,000 سے زائد پولنگ عملہ ڈیوٹی پر تعینات کیا گیا ہے۔خواتین کے زیر انتظام 19 پولنگ بوتھ ہوں گے (جنہیں گلابی پولنگ سٹیشن بھی کہا جاتا ہے)، 14 پولنگ بوتھ بالخصوص معذور افراد کے ذریعہ چلائے جائیں گے اور 17 کی دیکھ دیکھ نوجوان کریں گے۔ اِس کے علاوہ ماحولیاتی بیداری کے بارے میں پیغام پھیلانے کے لئے 20 سبز پولنگ سٹیشن ہوں گے۔الیکٹورل فوٹو شناختی کارڈ (ای پی آئی سی) کے علاوہ ووٹر کی تصدیق اور اسے ووٹ ڈالنے کی اجازت دینے کے لئے 12 قسم کے دستاویزات کی بھی اجازت ہوگی کیونکہ ووٹنگ کے لئے ای پی آئی سی کارڈ لازمی نہیں ہے۔ 200 پولنگ سٹیشنوں پر دو کیمرے لگائے جائیں گے جو اندرونی اور بیرونی نگرانی کے لئے ہوں گے۔ پولنگ پارٹیوں اور سیکٹر افسران کی تقریباً 2,100 گاڑیوں کو جی پی ایس سسٹم سے لیس کیا جائے گا ۔ 95 پولنگ سٹیشنوں کے لئے سیٹلائٹ فون، وائرلیس سیٹ اور سپیشل رنرز لگائے گئے ہیں۔
