نیوز ڈیسک
سرینگر// گپکار الائنس میں شامل نیشنل کانفرنس اور پی ڈی پی جموں و کشمیر میں اسمبلی انتخابات مشترکہ طور پر لڑیں گی۔ نیشنل کانفرنس صدر فاروق عبداللہ نے کہا، “ہم مل کر الیکشن لڑیں گے، ایک سیاسی جماعت ہے جس نے کہا کہ وہ اتحاد چھوڑ چکے ہیں، سچ یہ ہے کہ وہ کبھی بھی اتحاد کا حصہ نہیں تھے، وہ ہمیں اندر سے توڑنے کے لیے آئے تھے” ۔نیشنل کانفرنس صدر فاروق عبداللہ، جو پی اے جی ڈی کے سربراہ ہیں، نے نامہ نگاروں کو یہ بات بتائی۔اسی طرح کے جذبات کا اظہار پی ڈی پی صدر محبوبہ مفتی نے پیر کے روز ہی کیا تھا۔محبوبہ نے کہا کہ “ہم مل کر الیکشن لڑنے کا ارادہ رکھتے ہیں کیونکہ یہ عوام کی مرضی ہے کہ ہمیں اپنے کھوئے ہوئے وقار کی بحالی کے لیے مل کر جدوجہد کرنی چاہیے”۔ایک سوال کے جواب میں عبداللہ نے کہا کہ حکومت جب چاہے انتخابات کرائے جا سکتے ہیں۔
سابق وزیر اعلی نے مزید کہا کہ “جب ہمارے ہاں سیلاب آیا تھا تو الیکشن ہوئے تھے، اب الیکشن کیوں نہیں ہو سکتے؟ سوال یہ ہے کہ وہ الیکشن کیسے لڑنا چاہتے ہیں”۔جاری امرناتھ یاترا کے بارے میں پوچھے جانے پر عبداللہ نے کہا کہ یہ کشمیر کے لوگ ہیں جنہوں نے گزشتہ برسوں میں یاترا کے ہموار انعقاد کو یقینی بنایا ہے۔”انہوں نے مزید کہا کہ وہ شخص کون تھا جس نے گھپا کو دریافت کیا؟ وہ پہلگام کا ایک مسلمان تھا” ۔عبداللہ نے کہا کہ حکومت ہر گھر سے قومی پرچم لہرا سکتی ہے لیکن یہ بہت اچھا ہوگا جب لوگ اپنے طور پر ترنگا لہرائیں نہ کہ حکم کی وجہ سے “۔جموں و کشمیر کی پانچ جماعتوں پر مشتمل گپکار الائنس، اکتوبر 2020 میں آرٹیکل 370 کو بحال کرنے کے واضح مقصد کے ساتھ تشکیل دیا گیا تھا۔ مرکز نے سابقہ ریاست کو بھی دو UTs میں تقسیم کر دیا تھا۔ جموں و کشمیر، اور لداخ۔الیکشن کمیشن نے مرکز کے زیر انتظام علاقوں میں اسمبلی انتخابات کے انعقاد کے لیے تیاریاں شروع کر دی ہیں۔ اس نے جموں و کشمیر میں حد بندی کی مشق کے بعد انتخابی فہرستوں پر نظر ثانی کا آغاز کیا ہے۔
الیکشن کمیشن جموں و کشمیر کی حتمی انتخابی فہرستیں 31 اکتوبر کو شائع کرے گا، جو کہ اسمبلی سیٹوں کی حدود کو دوبارہ تیار کرنے کے بعد یونین ٹیریٹری کی پہلی ووٹر لسٹ ہے۔جموں و کشمیر کے چیف الیکٹورل آفیسر کو لکھے گئے خط میں پول پینل نے ووٹر لسٹوں کی حتمی اشاعت سے قبل مختلف سرگرمیوں کو مکمل کرنے کا ٹائم لائن دیا ہے۔
