محمد تسکین
بانہال // سرینگر بارہمولہ ادھمور ریل لنک پر دنیا کے بلند ترین ریلوے پل پر بدھ کوچھوٹی آزمائشی ٹرین چلائی گئی ۔ ٹرین کی آزمائش دریائے چناب پر تعمیر کئے گئے دنیا کے بلند ترین پل پر پہلے دن کامیاب رہی ۔یہ پل، تقریباً 1,400 کروڑ روپے کی لاگت سے تعمیر کیا گیا ہے، حالیہ تاریخ میں ہندوستان میں کسی بھی ریلوے پروجیکٹ کو درپیش سول انجینئرنگ کا یہ سب سے بڑا چیلنج تھا۔ ایک بار جب 111 کلومیٹر کا راستہ مکمل ہو جاتا ہے، توسرینگر جانے والی ٹرین بغیر کسی رکاوٹ کے کنیا کماری پہنچ سکتی ہے۔ حال ہی میں حکام نے چناب پل پر ٹریک بچھانے کا کام مکمل کیا۔اس سے قبل 2002 میں اسے قومی منصوبے کے طور پر اعلان کیا گیا تھا، اس منصوبے کی بارہمولہ سے ادھم پور تک 272 کلومیٹر کی لمبائی ہے، ۔ جبکہ 25 کلومیٹر طویل ادھم پور – کٹرہ سیکشن جولائی 2014 میں شروع کیا گیا تھا، 118 کلومیٹر طویل قاضی گنڈ-بارہمولہ سیکشن اکتوبر 2009 میں شروع کیا گیا اور قاضی گنڈ بانہال سیکشن جون 2013 میں شروع کیا گیا تھا۔یہ پل ریاسی ضلع میں بکل اور کْری کے درمیان بنایا گیا ہے۔ ہندوستانی ریلوے کے مطابق یہ پل سیسمک زون IV کے تحت آتا ہے۔ جب پل کی تعمیر 2002 میں شروع ہوئی تھی، اس پل کو ریل رابطے کی جانب ایک اہم قدم قرار دیا گیا تھا۔یہ پل شدت کے زلزلوں اور زیادہ شدت کے دھماکوں کو برداشت کر سکتا ہے۔ اس پل کو بنانے کے لیے تقریباً 300 انجینئرز اور 1,300 کارکنوں نے چوبیس گھنٹے کام کیا۔اس پل کو کل 27949 کروڑ روپے کی لاگت سے بنایا گیا ہے اور اس کی لمبائی 1315 میٹر ہے۔ یہ 28,660 میٹرک ٹن اسٹیل سے بنا ہے۔ پل کی کارآمد زندگی لگ بھگ 120 سال ہے۔
