یو این آئی

ناندیڑ// وزیر اعظم نریندر مودی نے ہفتہ کو کہا کہ انڈیا گروپ اپنے بدعنوان لوگوں کو بچانے کے لیے متحد ہوا ہے لیکن عوام نے انہیں انتخابات کے پہلے مرحلے میں ہی مکمل طور پر مسترد کر دیا ہے۔

مراٹھواڑہ کے علاقے ناندیڑ میں ایک انتخابی ریلی سے خطاب کرتے ہوئے مسٹر مودی نے کہا کہ انڈیا گروپ کے لیڈر خود کو بدعنوانی کے الزامات سے بچانے کے لیے متحد ہوئے ہیں لیکن عوام نے ووٹنگ کے پہلے مرحلے میں انہیں مکمل طور پر مسترد کر دیا ہے۔ انہوں نے کہا، “کانگریس کے شہزادے (راہل گاندھی) کے پاس اب کیرالہ کے وائناڈ سے الیکشن لڑنے کے سوا کوئی متبادل نہیں ہے، حالانکہ وہ امیٹھی کے ووٹروں کو چھوڑ کر بھاگ گئے، لیکن وہ وائناڈ سے بھی بھاگ سکتے ہیں۔

انہوں نے زور دے کر کہا کہ ملک ‘ترقی یافتہ ہندوستان’ کے لیے بی جے پی کی قیادت والے قومی جمہوری اتحاد (این ڈی اے) کو ووٹ دے رہا ہے۔ لوگوں کی ترقی کو روکنے کے لئے کانگریس پر حملہ کرتے ہوئے انہوں نے کہا، “کانگریس دلتوں، غریبوں اور محروموں کی ترقی کے درمیان دیوار ہے۔ آج بھی کانگریس ہماری حکومت کے کسی بھی ترقیاتی کام کی مخالفت کرتی ہے۔ ان سے کبھی بھی کسی مسئلے کے حل کی امید نہیں کی جا سکتی اور نہ ہی لوگ ان سے ترقی کے امکانات کی توقع کر سکتے ہیں۔

مراٹھواڑہ اور ودربھ کی سنگین صورتحال اور نازک حالات کا ذکر کرتے ہوئے مودی نے کہا کہ کئی دہائیوں سے کانگریس نے ودربھ اور مراٹھواڑہ کی ترقی کو روک رکھا ہے۔ یہ کانگریس کی پالیسیاں ہیں کہ مراٹھواڑہ اور ودربھ دونوں میں پانی کی قلت ہے۔ یہاں کے کسان غریب ہیں اور صنعتی ترقی کا کوئی امکان نہیں۔ انہوں نے کہا، ’’ہماری حکومت نے ناندیڑ کے 80 فیصد گھرانوں میں نلکے کے پانی کو فعال کیا ہے۔ ہماری مسلسل کوشش ایم ایس پی میں ریکارڈ اضافہ، پی ایم-کسان کے ذریعے آمدنی میں مدد اور ’شری انا‘ اسکیم کو فروغ دینے کے ذریعے اپنے کسانوں کو بااختیار بنانے کی سہولت فراہم کرنا ہے۔

پچھلی دہائی میں ناندیڑ میں بنیادی ڈھانچے کے فروغ پر روشنی ڈالتے ہوئے انہوں نے کہا، ‘مودی کانگریس کی طرف سے لگائے گئے ہر زخم کو ٹھیک کرنے کی گارنٹی ہے۔ ’’شکتی پیٹھ ہائی وے‘‘ اور ’’لاتور ریل کوچ فیکٹری‘‘ جیسے مضبوط انفراسٹرکچر کے تئیں ہمارا عزم ہے۔ ہمارا مقصد اگلے پانچ برسوں میں مراٹھواڑہ خطے کی ترقی کرنا ہے، ہم سب کو یہ یقینی بنانے کی کوشش کرنی چاہیے کہ ہندوستان ‘ترقی یافتہ ہندوستان’ بن جائے اور اس کے لیے بی جے پی کی قیادت والی این ڈی اے کو ووٹ دینا وقت کی ضرورت ہے۔

انہوں نے زبردست حمایت کا مظاہرہ کرنے پر ناندیڑ کے لوگوں کا شکریہ ادا کیا۔

مہاراشٹر میں لوک سبھا انتخابات کے دوسرے مرحلے کی ووٹنگ 26 اپریل کو ہوگی۔