راجوری//کئی پنچایتوں کو جموں راجوری پونچھ قومی شاہراہ سے ملانے والے ٹنڈوال پل کی اپروچ روڈ کی خستہ حالی کی وجہ سے حادثات کا خطرہ پیدا ہو رہا ہے اور لوگوں نے شدید خستہ حال سڑک کی فوری مرمت اور دیکھ بھال کا مطالبہ کیا ہے۔ٹنڈوال پل راجوری کے ٹنڈوال گاؤں میں قومی شاہراہ کے ساتھ واقع ہے اور یہ ایک درجن سے زیادہ دیہاتوں اور کئی پنچایتوں بشمول ٹنڈی ترار، پالولیان، کیریان، نمبلان، گھمبیر کو قومی شاہراہ سے جوڑتا ہے۔علاقہ کے مقامی لوگوں نے بتایا کہ ٹنڈوال پل سے شروع ہونے والی سڑک محکمہ پی ایم جی ایس وائی کے دائرہ کار میں آتی ہے لیکن اپروچ روڈ اور پل محکمہ تعمیرات عامہ کے ماتحت ہے۔
انہوں نے الزام عائد کرتے ہوئے کہاکہ متعلقہ حکام کی جانب سے اس سڑک کی جانب کوئی توجہ نہیں دی جارہی ہے ۔پل کے قریب اپنی دکان چلانے والے ایک شخص وپن شرما نے بتایا کہ ٹنڈوال پل علاقہ میں رابطے کا ایک اہم حصہ ہے اور اس پر سینکڑوں گاڑیاں گزرتی ہیں جبکہ سینکڑوں لوگ خصوصاً بچے روزانہ کی بنیاد پر اس پل سے گزرتے ہیں۔انہوں نے پل کی خستہ حالی پر تشویش کا اظہار کرتے ہوئے کہا کہ پل کی سطح اور اپروچ روڈ دونوں پر بڑے گڑھے اور کیچڑ ہے۔انہوں نے بتایا کہ ’’کئی بار دو پہیہ گاڑیاں اس پر پھسل جاتی ہیں اور لوگوں کو معمولی چوٹیں آتی ہیں لیکن ہمیں کسی بڑے حادثے کا خدشہ ہے کیونکہ اپروچ سڑکوں کے سروں پر کوئی مناسب حفاظتی بینڈ یا دیواریں نہیں بنائی گئی ہیں‘‘۔محکمہ تعمیرات عامہ (سڑکوں اور عمارتوں) پر تنقید کرتے ہوئے منوج نے کہا کہ اس سٹریٹ کی مرمت اور دیکھ بھال کا مطالبہ متعلقہ محکمہ سے بارہا کیا جاتا رہا ہے لیکن کوئی سنتا نہیں۔رابطہ کرنے پر ایگزیکٹیو انجینئر پبلک ورکس ڈیپارٹمنٹ کے دفتر نے ڈسٹرکٹ انفارمیشن سینٹر کے ذریعے ایک بیان جاری کیا۔
کشمیرعظمیٰ کو جاری کردہ سرکاری بیان میں محکمہ کی طرف سے بتایا گیا ہے کہ ٹنڈوال پل بشمول اپروچ کو پی ڈبلیو ڈی نے بہت پہلے مکمل کیا تھا لیکن شدید بارش کی وجہ سے اپروچ روڈ پر کچھ گڑھے پڑ گئے۔بیان میں بتایا گیا کہ گاڑیوں کی نقل و حرکت کیلئے اس کی مرمت کی جائے گی ۔
