عظمیٰ نیوز سروس
اکھنور//جمعہ کوبھگوان وشنو کے چھٹے اوتار، بھگوان پرشورام کا یوم پیدائش پورے ہندوستان میں بڑے دھوم دھام سے منایا گیا۔ جموں و کشمیر کے مختلف اضلاع میں بہت سے جلوس اور بہت سی بڑی برہمن کانفرنسیں منعقد کی گئیں۔ اکھنور کے لارڈ پرشورام مندر میں پردھان اشوک شاستری کی قیادت میں منعقدہ مذہبی پروگرام کے دوران صبح سے ہی ہون یگیہ اور پر تھانہ شروع ہو گئی۔ دن بھر مندر میں پوجا کرنے والوں کا ایک مستقل سلسلہ رہا۔اسی طرح کے مذہبی پروگرام جموں کے دیگر کئی علاقوں میں بھی منعقد کئے گئے۔ بھگوان پرشورام کے یوم پیدائش کو منانے کے لئے ڈوگرہ گرامین برہمن سبھا نے جمعہ کو 20 میل پر ایک بہت بڑا برہمن سمیلن منعقد کیا۔ پروگرام کا آغاز صدر کرشن لال شرما کی صدارت میں ہون، یگیہ اور پورناہوتی سے ہوا۔ پروگرام کے دوران سو طلباء کے لئے یگنوپوت تقریب بھی کی گئی۔ پروگرام کے دوران نوجوانوں کی جانب سے ایک عظیم الشان جلوس بھی نکالا گیا جو ٹھٹھی، دومی، سوہ نمبر 1، اگور، جنڈیال سے ہوتا ہوا رنجن 20 میل ریزورٹ پر اختتام پذیر ہوا۔عظیم برہمن سمیلن کے دوران، پدم شری پنڈت وشوامورتی شاستری مہمان خصوصی کے طور پر موجود تھے جبکہ پنڈت سریش شاستری، پنڈت وجے پراشر شاستری، پنڈت دیوراج شاستری بھی موجود تھے ۔
