عظمیٰ ویب ڈیسک
سرینگر// کانگریس کے سینئر رہنما کرن سنگھ کا کہنا ہے کہ عمر عبداللہ نے سرینگر کے بجائے بارہمولہ سے لوک سبھا انتخابات لڑ کر ایک بڑی “غلطی” کی ہے۔ سرینگر نیشنل کانفرنس کا گڑھ ہے جہاں سے پارٹی کے امیدوار آغا روح اللہ مہدی نے جیت حاصل کی ہے۔
سنگھ نے کہا، “اب صرف کانگریس ہی نہیں، انڈیا اتحاد بھی تشکیل پایا ہے۔ حال ہی میں ختم ہونے والے لوک سبھا انتخابات میں اتر پردیش میں کیا ہوا؟ سماج وادی پارٹی اور کانگریس کے درمیان گٹھ جوڑ سیٹوں کی اکثریت حاصل کرنے میں ناکام ہوا۔ مجھے لگتا ہے کہ انڈیا بلاک کی تشکیل میں تھوڑا سا وقت لگے گا لیکن یہ یقینی طور پر کام کرے گا”۔
نیشنل کانفرنس کے بانی اور عمر عبد اللہ کے دادا شیخ عبداللہ کے بارے میں سنگھ نے کہا کہ اگرچہ وہ ایک “عظیم لیڈر” تھے اور وادی کشمیر کے لوگ ان جیسا لیڈر کبھی نہیں دیکھیں گے، لیکن انہوں نے ڈوگرہ خاندان کے شاندار دور کو “ختم” کر دیا تھا۔ اس وقت کی شاہی ریاست میں “پولرائزڈ سیاسی مہم” چلائی تھی۔
سنگھ نے کہا، “شیخ عبداللہ نے اپنے دور حکومت میں (بطور وزیر اعظم اور جموں و کشمیر کے وزیر اعلیٰ)، زمینی اصلاحات سمیت امتیازی اور بنیاد پرست فیصلے لیے… وہ ایک کشمیری رہنما تھے جو اس قیادت کو جموں یا لداخ میں تبدیل کرنے کے قابل بھی نہیں تھے”۔
1990 کی دہائی کے اوائل میں جموں و کشمیر میں دہشت گردی کے پھیلنے پر سنگھ نے کہا کہ کشمیری پنڈتوں کا بڑے پیمانے پر ہجرت ایک خوفناک سانحہ تھا اور ان زخموں کو بھرنے میں کافی وقت لگے گا۔
انہوں نے کہا، “میرے خیال میں لوگ اب یہ سمجھ رہے ہیں کہ انہیں اپنی زندگیوں کے ساتھ آگے بڑھنا ہے اور صرف ماضی کو نہیں دیکھنا ہے۔ میں نے کبھی پیچھے مڑ کر نہیں دیکھا، نہ غصے میں اور نہ ہی ندامت میں‘‘۔
جموں خطے میں دہشت گردی کے واقعات میں اضافے پر تشویش کا اظہار کرتے ہوئے سنگھ نے فرقہ وارانہ تقسیم پیدا کرنے کے لیے قوم کے دشمنوں کے مذموم عزائم کو ناکام بنانے کی اہمیت پر زور دیا۔
رواں ماہ جموں خطہ کے ریاسی، کٹھوعہ اور ڈوڈہ میں دہشت گردی کے چار واقعات میں دس افراد بشمول ایک بس میں مندر جانے والے سات یاتریوں سمیت ہلاک اور متعدد زخمی ہوئے۔
سنگھ نے کہا، “بلاشبہ سب سے بڑا خطرہ دہشت گردی اور ریاست کے اندر کسی بھی قسم کی فرقہ وارانہ تقسیم ہے۔ جس سے ہر حال میں بچنا ہے۔ میرے آباؤ اجداد نے اس ریاست کی بنیاد رکھی۔ بھولنا مت۔ یہ ڈوگرہ ریاست ہے۔ یہ (پہلے ڈوگرہ حکمران) مہاراجہ گلاب سنگھ سے پہلے موجود نہیں تھا”۔
سنگھ نے کہا کہ بھلے ہی آج جموں و کشمیر کو مرکزی زیر انتظام علاقہ بنا دیا گیا ہو لیکن یہ اب بھی ڈوگرہ ریاست ہے۔
انہوں نے کہا، “یہ گلگتیوں، لداخیوں، کشمیریوں، گجروں، پنجابی مسلمانوں اور ڈوگروں کا جامع مرکب ہے۔ یہ کبھی بھی ایک واحد ریاست نہیں رہی اور اسے برقرار رکھا جانا چاہیے۔ کم و بیش، مجھے یہ کہنا ضروری ہے کہ 100 سال کے ڈوگرہ حکمرانی میں، ہم ریاست میں ہم آہنگی اور امن برقرار رکھنے میں کامیاب رہے”۔
