عظمیٰ نیوز سروس
سرینگر// بھارتیہ جنتا پارٹی کے صدر رویندر رینہ نے اتوار کو کہا کہ ان کی پارٹی وادی کشمیر میں ہم خیال جماعتوں کی حمایت کرے گی ۔ انہوں نے لوگوں کو کانگریس سے دور رہنے کے لیے خبردار کیا۔رینہ نے دعویٰ کیا کہ بی جے پی جموں اور ادھم پور دونوں لوک سبھا سیٹوں پر بڑی کامیابی حاصل کرے گی۔انہوں نے میڈیا کو بتایا، بی جے پی کا وادی کشمیر میں دیگر ہم خیال جماعتوں کے ساتھ اچھا تعلق ہے۔انہوں نے کہا، “ہم پارٹی کارکنوں کے ساتھ رسمی بات چیت کے بعد ہم خیال گروپوں اور اچھے امیدواروں کو اپنی حمایت دینے کے منتظر ہیں۔”یہ پوچھے جانے پر کہ کشمیر میں بی جے پی کس کو دوست سمجھتی ہے، رینہ نے کہا: “بہت ساری پارٹیاں ہیں جو لوگوں کے ساتھ بہت ہمدردی رکھتی ہیں، ہم اپنے کارکنوں سے بات کریں گے اور اعلان کیا جائے گا۔بی جے پی کی جانب سے اننت ناگ-راجوری سیٹ کے لیے انتخابات کو ملتوی کرنے کے بارے میں پوچھے جانے پر، رینہ نے کہا کہ اس کا فیصلہ الیکشن کمیشن آف انڈیاکو کرنا ہے کہ انتخابات کو ملتوی کیا جائے یا نہیں۔رویندر رینہ گنڈ بل میں کشتی کے سانحے سے متاثرہ خاندانوں کے ساتھ دلی تعزیت کرنے کے لیے گنڈبل بٹوارہ علاقے کا دورہ کیا۔سوگوار خاندانوں کے بے پناہ نقصان اور درد کو تسلیم کرتے ہوئے، رینہ نے انہیں اس مشکل دور میں تمام ضروری مدد فراہم کرنے کے لیے پارٹی کے غیر متزلزل عزم کا یقین دلایا۔
