محمد تسکین
بانہال// سب ڈویژن بانہال علاقے کے کھڑی علاقے میں بانہال سے تعلق رکھنے والا ایک نوجوان ایک حادثے میں لقمہ اجل بنا ہے۔ بتایا جاتا ہے کہ امتیاز احمد کمہار عمر 20 سال ولد مرحوم غلام رسول کمہار ساکنہ درمنن بنکوٹ اتوار کے روز کھڑی کے علاقے میں ریلوے تعمیراتی کمپنی کے ساتھ کام کرتا تھا اور دوران کام 8 کوئنٹل وزنی لوہے کی ایک پلیٹ اس نوجوان پر گر آئی جس کی وجہ سے وہ شدید زخمی ہوا اور اس نوجوان نے بانہال ہسپتال لیجاتے ہوئے دم توڑ دیا۔اس خبر کے پھیلتے ہی بنکوٹ کے علاقے میں رنج و الم کی لہر دوڑ گئی اور لوگ مہلوک نوجوان کے گھر واقع درمنن بنکوٹ پہنچنا شروع ہوئے۔ اس دوران لاش کو کھڑی سے سب ضلع ہسپتال بانہال پہنچایا گیا جہاں ضروری طبی اور قانونی لوازمات کے بعد امتیاز احمد کی میت کو دیر شام سپرد خاک کیا گیا۔پولیس نے ایک کیس درج کرکے معاملے کی تحقیقات شروع کردی ہے۔ مقامی سرپنچ اور سیاسی و سماجی لیڈر محمد الیاس بانہالی نے مہلوک نوجوان کو لیبر قوانین کے مطابق ہر ممکن معاوضہ اور مالی مدد کی اپیل کی ہے تاکہ گھر کے واحد کماؤ کی موت سے اس کنبے کو سہارا مل سکے۔
