یو این آئی
میڈرڈ// دنیا کے نمبر ایک سربیا کے ٹینس کھلاڑی نوواک جوکووچ کو پانچویں بار لاریئس ورلڈ اسپورٹس مین آف دی ایئر ایوارڈ سے نوازا گیا ہے۔پیر کو میڈرڈ کے گیلیریا ڈی کرسٹل میں منعقدہ ایک شاندار تقریب میں جوکووچ کو ان کی شاندار کارکردگی کے لیے اعلیٰ ایوارڈ سے نوازا گیا۔ جب کہ ساتھی ٹینس کھلاڑی رافیل نڈال کو ان کی فاؤنڈیشن کی بدولت ‘اسپورٹ فار گڈ ایوارڈ’ سے نوازا گیا۔ایوارڈ کے بعد جوکووچ نے کہا، “میں اپنا پانچواں لاریئس ورلڈ اسپورٹس مین آف دی ایئر کا ایوارڈ جیتنے پر ناقابل یقین حد تک فخر محسوس کر رہا ہوں۔ میں 2012 کو یاد کرتا ہوں، جب میں نے 24 سال کی عمر میں اسے پہلی بار جیتا تھا۔ مجھے 12 سال بعد یہاں آنے پر بہت فخر ہے، اس سے ظاہر ہوتا ہے کہ ایک ایسا سال جو میرے اور میرے مداحوں کے لئے بہت جوش وخروش اور کامیابی لے کر آیا۔انہوں نے کہا، “میں اپنے پیچھے ایک ناقابل یقین ٹیم اور متاثر کن حریفوں کے بغیر اتنی کامیابی حاصل نہیں کر پاتا جنہوں نے ہمیشہ مجھے اپنا بہترین ورڑن بننے کی ترغیب دی ہے۔”دیگر اعزازات میں اسپین کی فٹ بال اسٹار ایٹانا بونماتی کو اسپورٹس وومن آف دی ایئر اورورلڈ کپ جیتنے والی ان کی ٹیم کو لاریئس ٹیم ایوارڈ سے نوازا گیا۔ جب کہ امریکی جمناسٹک اسٹار سیمون بائلز کو کم بیک آف دی ایئر کا ایوارڈ ملا۔
