عظمیٰ ویب ڈیسک

جموں//مرکزی وزیر داخلہ امت شاہ نے پیر کو کہا کہ جموں و کشمیر نے دفعہ 370 کی منسوخی کے بعد تعمیر اور ترقی کی نئی بلندیوں کو حاصل کیا ہے اور اب جموں و کشمیر نے 100 فیصد کھلے میں رفع حاجت سے پاک (ODF) کا درجہ حاصل کر لیا ہے۔
شاہ نے ‘ایکس’، پر اپنے جذبات کا اظہار کیا کرتے ہوئے کہا کہ جموں و کشمیر نے جاری ‘سوچھتا ہی سیوا’ مہم کے دوران 100 فیصد او ڈی ایف پلس ماڈل کا درجہ حاصل کر لیا ہے۔
شاہ نے کہا، “جموں و کشمیر کے لوگوں کو 100 فیصد او ڈی ایف پلس کا درجہ حاصل کرنے کے لیے دل کی گہرائیوں سے مبارکباد۔ وزیر اعظم نریندر مودی کی قیادت میں دفعہ 370 کی منسوخی کے بعد، جموں و کشمیر نے تعمیر اور ترقی کی نئی بلندیوں کو حاصل کیا ہے”۔
اُنہوں نے مزید کہا،”مرکزی حکومت کی طرف سے نافذ کردہ سکیموں کو اب بغیر کسی رکاوٹ کے جموں و کشمیر کے کونے کونے تک پہنچایا جا رہا ہے۔ ملک بھر کے لوگوں اور جموں و کشمیر میں رہنے والوں نے خطے میں آنے والی تبدیلی کا تجربہ کیا ہے۔ میں اس شاندار کارنامے کے لیے لیفٹیننٹ گورنر منوج سنہا اور مقامی انتظامیہ کو دلی مبارکباد پیش کرتا ہوں”۔
اس سے قبل، 29 ستمبر کو، جموں و کشمیر کے لیفٹیننٹ گورنر منوج سنہا نے ‘ایکس’ پر کہا کہ “وزیر اعظم نریندر مودی کی رہنمائی میں، جموں و کشمیر رفعہ حاجت سے 100 فیصد یوٹی بن گیا ہے اور ODF پلس کا درجہ حاصل کر لیا ہے۔ یہ کامیابی شہریوں کے معیار زندگی کو بہتر بنانے کے لیے سب کی مربوط کوششوں کی نشاندہی کرتی ہے”۔