زیرِ حراست افراد کو باہر منتقل کرنے کا معاملہ، ہائی کورٹ کو فوری جانچ کرنے کا حکم

File Photo

نئی دہلی// سپریم کورٹ نے منگل کو ایک عرضی جموں و کشمیر ہائی کورٹ کو منتقل کر دی ہے جس میں الزام لگایا گیا ہے کہ عوامی تحفظ قانون کے تحت زیر حراست 20 سے زائد افراد کو یونین ٹیریٹری کی جیلوں سے باہر اتر پردیش اور ہریانہ کی مختلف جیلوں میں منتقل کر دیا گیا ہے۔
چیف جسٹس ڈی وائی چندر چوڑ اور جسٹس پی ایس نرسمہا اور جے بی پاردی والا پر مشتمل بنچ نے کہا کہ چونکہ ہائی کورٹ جموں و کشمیر پبلک سیفٹی ایکٹ 1978 میں کی گئی 2018 کی ترامیم کو چیلنج کرنے والی درخواستوں پر سماعت کیلئے مجاز ہے، اس لیے مناسب ہو گا کہ موجودہ درخواست کی وہاں سماعت کی جائے۔
سالیسٹر جنرل تشار مہتا، یونین ٹیریٹری کے لیے پیش ہوئے، نے کہا کہ خاندان کے افراد کو دیگر ریاستوں کی جیلوں میں بند قیدیوں سے ملاقات کی سہولت فراہم کی جا رہی ہے اور یہ ایک قابلِ قبول عمل ہے۔
راجہ بیگم اور نظربندوں کے دیگر رشتہ داروں کی جانب سے دائر درخواست کو ہائی کورٹ میں منتقل کرتے ہوئے، بنچ نے ہائی کورٹ کے چیف جسٹس سے کہا کہ وہ درخواست کی جلد سماعت کریں اور درخواست گزاروں کی طرف سے پیش ہونے والے سینئر وکیل کولن گونسالویس کو اس کا ذکر کرنے کی آزادی دی۔
عدالت نے کہا،”یہاں یہ بتانے کی ضرورت نہیں ہے کہ ہائی کورٹ اس عدالت کے حکم کے مطابق اس درخواست کو نمٹائے گی”۔
اس سے قبل، سپریم کورٹ نے گزشتہ سال 4 نومبر کو مرکز، جموں و کشمیر حکومت اور دیگر سے اس درخواست پر جواب طلب کیا تھا جس میں الزام لگایا گیا تھا کہ پبلک سیفٹی قانون کے تحت حراست میں لیے گئے متعدد افراد کو جموں وکشمیر کی جیلوں سے باہر اتر پردیش اور ہریانہ کی جیلوں میں منتقل کیا گیا ہے۔
گونسالویس نے نظربندوں کے لواحقین کی طرف سے پیش ہوتے ہوئے کہا تھا کہ انہیں جموں و کشمیر کی جیلوں سے باہر منتقل کر دیا گیا ہے اس طرح ان کے رشتہ داروں کو ان سے ملنے کے موقع سے محروم کر دیا گیا ہے۔
انہوں نے کہا تھا کہ مقامی قانون کے تحت حراست میں لیے گئے لوگوں کو یونین ٹیریٹری سے باہر نہیں منتقل کیا جا سکتا ہے کیونکہ یہ قانون صرف یونین ٹیریٹری پر لاگو ہوتا ہے۔
حراست میں لیے گئے افراد جموں و کشمیر پبلک سیفٹی ایکٹ 1978 کی دفعات کے تحت احتیاطی حراست میں ہیں۔
درخواست راجہ بیگم نامی خاتون اور تین دیگر افراد نے دائر کی تھی۔ ان میں سے ایک، عارف احمد شیخ، ولد بیگم، جو سری نگر کے پاریم پورہ کی رہائشی ہے، کو اتر پردیش کے وارانسی کی سینٹرل جیل میں منتقل کیا گیا تھا۔انہیں 7 اپریل 2022 کو پی ایس اے کے تحت حراست میں لیا گیا تھا۔