عظمیٰ ویب ڈیسک

جموں// لیفٹیننٹ گورنر منوج سنہا نے اتوار کو دعویٰ کیا کہ پاکستان انتہائی غیر ملکی تربیت یافتہ دہشت گردوں کو جموں و کشمیر میں سلامتی کی صورتحال کو غیر مستحکم کرنے کے لیے دھکیل رہا ہے۔ اُنہوں نے کہا کہ پڑوسی ملک کے مذموم عزائم کو ناکام بنانے کے لیے ایک حکمت عملی بنائی گئی ہے اور سیکورٹی فورسز کو دوبارہ تعینات کیا جا رہا ہے۔
قومی خبر رساں ایجنسی پی ٹی آئی کے ساتھ ایک خصوصی انٹرویو میں، انہوں نے زور دے کر کہا کہ “اگلے تین ماہ میں صورتحال میں بڑی تبدیلی” آئے گی۔
جموں خطہ میں ملی ٹینسی کے واقعات کی طرف اشارہ کرتے ہوئے سنہا نے کہا، “یہ واقعات افسوسناک ہیں۔ ہم انہیں تسلیم کرتے ہیں اور جموں و کشمیر اور ملک کے لوگوں کو یقین دلانا چاہتے ہیں کہ ان واقعات پر یقینی طور پر قابو پالیا جائے گا۔ پڑوسی ملک اپنے مذموم عزائم میں کامیاب نہیں ہو گاـ”۔
انہوں نے پی ٹی آئی کو بتایا، “پاکستان دہشت گردی کی جنم بھومی ہے، یہ وہیں سے پھوٹتی ہے۔ بھارت اور جموں و کشمیر انتظامیہ اس کا مقابلہ کرنے کے لیے ٹھوس کوششیں کر رہی ہے، کئی دوسرے ممالک بھی ان کوششوں میں تعاون کر رہے ہیں‘‘۔
ایل جی نے صورتحال پر قابو پانے میں فوج، سی آر پی ایف اور جموں و کشمیر پولیس پر مکمل اعتماد کا اظہار کیا اور کہا، ’’آپ آنے والے تین مہینوں میں بڑی تبدیلی دیکھیں گے‘‘۔
سنہا نے کہا کہ پڑوسی ملک یہاں کے حالات کو خراب کرنے کے لیے غیر ملکی دہشت گردوں کو دھکیل رہا ہے۔ گزشتہ واقعات کو مدنظر رکھتے ہوئے سیکورٹی فورسز اور انتظامیہ نے حکمت عملی ترتیب دی ہے۔ فورسز کی دوبارہ تعیناتی شروع ہو گئی ہے… فوج، سی آر پی ایف اور پولیس اہلکاروں کی تعیناتی بڑھ گئی ہے۔
انہوں نے مزید کہا کہ سیکورٹی فورسز نے اپنی تیاریاں مکمل کر لی ہیں اور دہشت گردی کے ان واقعات سے نمٹنے کے لیے آگے بڑھ رہے ہیں۔ “(مرکزی) وزیر داخلہ نے حکمت عملی کا جائزہ لیا ہے۔ مجھے لگتا ہے کہ آنے والے دنوں میں خطے میں بہتر نتائج دیکھنے کو ملیں گے‘‘۔
جموں و کشمیر میں پاکستان کی طرف سے مشکلات کو ہوا دینے کے بارے میں تبصرہ کرنے کے لیے پوچھے جانے پر، انہوں نے کہا، “ہم پاکستان کی اندرونی صورتحال سے بے خبر دکھائی دیتے ہیں۔ ملک اپنے ہی لوگوں کو خوراک تک فراہم نہیں کر سکتا۔ اس کی وجہ سے جموں و کشمیر ان کے لیے پسندیدہ موضوع بن گیا ہے”۔
ایل جی نے کہا کہ پاکستان یہ قبول کرنے میں ناکام ہے کہ بھارت نے اسے جنگوں میں شکست دی۔ اس لیے وہ خطے کو غیر مستحکم کرنے کی کوششیں جاری رکھے ہوئے ہے۔ بین الاقوامی محاذ پر بھارت کی حمایت میں اضافہ ہوا ہے۔دفعہ 370 کی منسوخی کے دوران بھی، کچھ ممالک، جن کے نقطہ نظر ہم سے مختلف تھے، نے اسے بھارت کا اندرونی معاملہ تسلیم کیا۔
ان دعووں کے بارے میں ایک سوال کے جواب میں کہ پاکستانی فوج کے سپیشل سروس گروپ (SSG) کے ذریعہ تربیت یافتہ افراد کو جموں و کشمیر میں دہشت گردی کے واقعات کو انجام دینے کے لیے بھیجا جا رہا ہے، سنہا نے قبول کیا کہ انتہائی تربیت یافتہ غیر ملکی عسکریت پسند خطے میں گھس آئے ہیں۔
اُنہوں نے کہا، “یہ ایک حساس مسئلہ ہے۔ ان مسائل پر پریس میں بات کرنا مناسب نہیں۔ یہ ضروری نہیں کہ ہر چیز کو عوامی سطح پر ظاہر کیا جائے۔ تاہم، جو لوگ اس طرف دراندازی کر چکے ہیں وہ واقعی اعلیٰ تربیت یافتہ ہیں‘‘۔
علاقے میں ایس ایس جی کے جوانوں کی دراندازی سے متعلق مخصوص معلومات کے بارے میں پوچھے جانے پر، انہوں نے کہا، “آپ نے جو معلومات بتائی ہیں وہ جزوی طور پر درست ہیں۔ انٹیلی جنس ایجنسیوں کے پاس مزید معلومات ہیں۔ پڑوسی ملک چاہے جتنی بھی کوشش کرے، وہ اپنے عزائم میں کامیاب نہیں ہوں گے۔
ایک جامع حکمت عملی کے ساتھ دراندازی کرنے والوں کو ختم کیا جائے گا۔ سیکورٹی گرڈ کو مضبوط کیا جا رہا ہے، اس طرح صورتحال میں مکمل تبدیلی لائی جا رہی ہے۔ سیکوریٹی فورسس زمین پر اپنی حکمت عملی کو ٹپوگرافی کو مدنظر رکھتے ہوئے نافذ کر رہی ہیں۔
جموں اور کشمیر میں عسکریت پسندی کے عروج کے دوران سیکورٹی کی تعیناتیوں کو یاد کرتے ہوئے، ایل جی نے کہا، “وہاں آپریشنل اور اقلیتی پکٹس ہوا کرتے تھے… ان کی طاقت زیادہ تھی۔ لیکن جب حالات بہتر ہوئے تو طاقت کم ہو گئی”۔
یہ کہتے ہوئے کہ جموں خطہ پچھلے 15 سے 16 سالوں سے پرامن تھا، سنہا نے کہا، “ہمارا پڑوسی پرامن نہیں ہے”۔
اُنہوں نے کہا کہ اگر انتخابات (یہاں) پرامن طریقے سے ہوتے ہیں اور لوگ بڑی تعداد میں ووٹ دیتے ہیں تو یہ قدرتی طور پر (پاکستان کے لیے) تکلیف کا باعث بنتا ہے۔ اعداد و شمار کے مطابق، اگر آپ سیکورٹی اہلکاروں یا ہلاک ہونے والے شہریوں کے اعداد و شمار کا موازنہ کریں، تو اس میں نمایاں کمی واقع ہوئی ہے۔
سنہا نے مزید کہا کہ کسی بھی نامی تنظیم کے اعلیٰ کمانڈر اب زندہ نہیں ہیں۔ میں اسے ایک بڑی کامیابی سمجھتا ہوں کہ عسکری صفوں میں مقامی بھرتی تقریباً بند ہو گئی ہے۔ اب، پڑوسی یہاں دہشت گردوں کو گھسا کر حالات کو خراب کرنا چاہتا ہے”۔
اُنہوں نے کہا کہ ماضی قریب میں جموں خطہ میں ملی ٹینسی کے تین یا چار واقعات ہوئے ہیں۔ سنہا نے مزید کہا، ’’یہ انتہائی افسوسناک ہے اور اس کی کافی مذمت نہیں کی جا سکتیـ”۔