اسرائیل میں اینٹی ٹینک میزائل حملے میں کیرالہ کا شہری ہلاک، 2 دیگر زخمی

عظمیٰ ویب ڈیسک

یروشلم// حماس کے ساتھ جاری جنگ کے درمیان اسرائیل پر لبنان کے میزائل حملے میں ایک بھارتی شہری ہلاک ہو گیا ہے جبکہ 2 دیگر زخمی ہوگئے ہیں۔
سرکاری ذرائع کے کے مطابق، یہ تینوں بھارتی شہری کیرالہ کے رہائشی ہیں۔ میزائل حملہ پیر کی صبح تقریباً 11 بجے اسرائیل کے علاقے گلیلی میں ہوا۔ میزائل ایک کھیت میں گرا، جہاں کام کرنے والے لوگ اس کی زد میں آ گئے۔ حملے میں ہلاک ہونے والے بھارتی شہری کی شناخت پیٹنی میکسویل کے طور پر ہوئی ہے جو کیرالہ کے کولم کا رہنے والا ہے۔ زخمیوں کی شناخت بش جوزف جارج اور پال میلون کے طور سے ہوئی ہے۔
سرکاری ذرائع نے بتایا کہ جارج کو میزائل حملے میں جھلسنے کی وجہ سے قریبی بیلنسن اسپتال میں داخل کرایا گیا ہے۔ اس کا چہرہ جل گیا ہے۔ اس کا آپریشن ہو رہا ہے اور وہ صحت یاب ہو رہا ہے۔ اسے زیر نگرانی رکھا گیا ہے۔
اس دوران میلون کو معمولی چوٹیں آئی ہیں اور اسے شمالی اسرائیل کے زیو ہسپتال میں داخل کرایا گیا ہے۔ خیال کیا جاتا ہے کہ یہ حملہ لبنان کی حزب اللہ نے کیا ہے۔ حزب اللہ 8 اکتوبر سے اسرائیل پر مسلسل راکٹ، میزائل اور ڈرون حملے کر رہا ہے۔
اسرائیل میں ایک بھارتی شہری موت پر تعزیت کا اظہار کرتے ہوئے، اسرائیل میں بھارتی سفارت خانے نے ایک بیان جاری کیا ہے جس میں کہا گیا ہے، ” ہم حزب اللہ کے بزدلانہ دہشت گردانہ حملے میں ایک ہندوستانی شہری کی موت کی شدید مذمت کرتے ہیں، جو صرف ایک کھیت میں کام کر رہا تھا۔ ہماری دعائیں اور تعزیت متاثرین اور زخمیوں کے اہل خانہ کے ساتھ ہیں۔ اسرائیلی طبی ادارے زخمیوں کو بہترین علاج فراہم کر رہے ہیں۔ اسرائیل دہشت گردی کے واقعات میں مارے جانے والے ہر شہری کے ساتھ یکساں سلوک کرتا ہے، چاہے وہ بھارتی ہو یا کسی اور ملک کا”۔
اسرائیل اور حماس کے درمیان گزشتہ سال 7 اکتوبر سے جنگ جاری ہے۔ حماس نے اسرائیل پر پانچ ہزار سے زائد راکٹ فائر کیے تھے۔ اس کے بعد اسرائیل نے اعلان جنگ کر دیا تھا۔ اسرائیل اور حماس کے درمیان جاری جنگ میں اب تک ہزاروں افراد لقمہ اجل بن چکے ہیں۔