سری نگر//جموں و کشمیر کے مفتی اعظم ناصر الاسلام نے منگل کو کہا کہ عید کا چاند 20 اپریل کو نظر آنے کی صورت میں عید کے بعد قضا روزہ رکھیں گے۔
انہوں نے کہا کہ شب قدر 17 اپریل کو منائی جائے گی۔
بتادیں کہ مفتی اعظم کی سربراہی میں آج سرینگر میں ایک اجلاس منعقد کیا گیا، جس میں مولانا رحمت اللہ قاسمی، غلام رسول حامی اور پروفیسر محمد طیب کاملی، مولانا آغا سید الحسن موسوی، غلام محمد بٹ، مولانا فیاض احمد رضوی، مسرور عباس انصاری اور دیگر شامل تھے۔
علمائے کرام کے اجلاس کے بعد صحافیوں سے گفتگو کرتے ہوئے، مفتی اعظم نے کہا، “شب قدر 17 اپریل کو منائی جائے گی، چاند کی رویت 20 اپریل کو ہوگی اور اگر چاند نظر آگیا تو عید کے بعد ایک دن کا قضا روزہ رکھیں گے”۔
انہوں نے کہا کہ عید کے حوالے سے کوئی بھی فیصلہ علمائے کرام سے مکمل مشاورت کے بعد کیا جائے گا۔ انہوں نے کہا کہ کسی بھی اعلان سے پہلے محکمہ موسمیات سے بھی مشاورت کی جائے گی۔
قابل ذکر بات یہ ہے کہ اس سے قبل روزے کو لے کر تنازعہ بھی ہوا تھا کیونکہ مفتی اعظم نے کہا تھا کہ عوام جمعہ سے روزہ رکھیں جب کہ کشمیر میں لوگوں کی اکثریت نے جمعرات سے روزہ رکھنا شروع کر دیا تھا۔ مفتی اعظم نے کہا تھا کہ انہیں بدھ کی رات رمضان کا چاند نظر آنے کے بارے میں کوئی گواہ نہیں ملا تھا۔
20 اپریل کو چاند نظر آیا تو عید کے بعد قضا روزہ رکھیں گے: مفتی اعظم
