عظمیٰ ویب ڈیسک
سری نگر// چیف الیکٹورل آفیسر (سی ای او) پی کے پول نے جمعہ یکم دسمبر کو جموں و کشمیر کے سول اور پولیس اضلاع کے سربراہوں کی ایک اعلیٰ سطحی میٹنگ طلب کی ہے تاکہ اگلے سال اپریل-مئی میں ہونے والے لوک سبھا انتخابات کے انتظامات کا جائزہ لیا جا سکے۔
سی ای او کے ذریعہ لوک سبھا انتخابات کے انتظامات کا یہ پہلا اعلیٰ سطحی جائزہ اجلاس ہوگا جس میں سینئر افسران شامل ہوں گے جو پولنگ سے متعلق مجموعی انتظامات کے ذمہ دار ہوں گے۔
میٹنگ میں ای وی ایم، وی وی پی اے ٹی کی ضروریات، نوڈل افسروں کی تقرری، عملے کی تربیت وغیرہ پر بھی تبادلہ خیال کیا جائے گا۔
جموں و کشمیر میں پانچ پارلیمانی نشستیں ہیں جن میں جموں-راجوری، ادھم پور-ڈوڈہ، سری نگر-بڈگام، بارہمولہ-کپواڑہ اور جنوبی کشمیر-پونچھ شامل ہیں۔ اس وقت نیشنل کانفرنس کے پاس تین اور بھارتیہ جنتا پارٹی (بی جے پی) کے پاس دو سیٹیں ہیں۔
ذرائع نے بتایا کہ جموں و کشمیر کی خصوصی سمری نظرثانی بھی آخری مرحلے میں ہے اور حتمی فہرستیں 8 جنوری 2024 کو شائع ہونے کا امکان ہے۔
