بانہال میں آتشزدگی کا واقع، 2 رہائشی مکان مال و اسباب سمیت خاکستر

File Photo

محمد تسکین

بانہال// بانہال میں کراواہ کی گوجر بستی میں آتشزدگی کی ایک ہولناک واردات میں 2 رہائشی مکان مکمل طور سے خاکستر ہو گئے ہیں اور دونوں مکانوں میں ضروریات زندگی کا لاکھوں روپئے کا مال و اسباب تباہ ہوا ہے۔
بانہال قصبہ سے 4 کلومیٹر دور گوجر ناڑ کراواہ کی بستی کو ابھی تک سڑک رابطے سے جوڑا نہیں گیا ہے اور زیارت دستگیر صاحب کراواہ سے صرف دو کلومیٹر دور یہ بستی سڑک سے نہیں جوڑی گئی ہے۔
گوجر ناڑ کراواہ کو سڑک رابطے نہ ہونے سے سے فائر سروسز کو متاثرہ مقام تک واٹر موٹر اور پائپ لائین کو اٹھا کر لے جانے اور پائپ لائین بچھانے میں وقت لگا اور تب تک یہ دونوں رہائشی مکان راکھ کے ڈھیر میں تبدیل ہو چکے تھے۔
یہ دونوں رہائشی مکان محمد اشرف چوہان ولد عبداللہ چوپان اور محمد ابراہیم گوجر ولد غلام حسین وارڈ نمبر ایک پنچایت کراواہ بانہال کے تھے ۔
مقامی لوگوں نے کشمیر عظمی کو بتایا کہ ابراہیم گوجر کی دو بیٹیوں کی شادی جلد ہی ہونے والی تھی اور انہوں نے شادی کیلئے تمام سامان راشن کپڑے، زیورات وغیر جمع کر رکھا تھا اور وہ بھی آگ کی ہولناک واردات میں راکھ ہو گیا ہے اور تن پر بچے کپڑوں کے سوا یہ دونوں کنبے کچھ بھی بچا نہیں سکے ہیں۔
انہوں نے کہا کہ مقامی لوگوں نے آگ بجھانے کی کوشش کی مگر وہ ناکام رہے۔