عظمیٰ ویب ڈیسک
سرینگر// جموں و کشمیر میں سی پی آئی (ایم) کے سینئر رہنما محمد یوسف تاریگامی نے منگل کو بی جے پی پر آمریت کا سہارا لینے کا الزام لگایا اور کہا کہ ان کی پارٹی ووٹوں کو مستحکم کرنے اور بھاجپا سے چھٹکارا پانے کیلئے مرکز کے زیر انتظام علاقے میں لوک سبھا سیٹوں پر انتخاب نہیں لڑے گی”۔
انہوں نے لوک سبھا انتخابات کے لئے سیٹوں کی تقسیم پر پیپلز الائنس فار گپکار ڈیکلریشن (PAGD) حلقوں کے اندر مبینہ تنازعے کو یہ کہتے ہوئے کم کرنے کی کوشش کرتے ہوئے کہا کہ یہ انتخابی اتحاد نہیں ہے اور ہر حلقہ کے اپنے سیاسی مفادات ہیں۔
تاریگامی نے قومی خبر رساں ایجنسی پی ٹی آئی کو ایک خصوصی انٹرویو میں بتایا،”ہم براہ راست (جموں و کشمیر میں لوک سبھا انتخابات) نہیں لڑیں گے۔ آج کے دور میں ہمارا سیاسی طریقہ بی جے پی کو شکست دینا، انہیں حکومت بنانے سے روکنا ہے۔ انہوں نے پہلے ہی جموں اور کشمیر کو بہت نقصان پہنچایا ہے” ۔
اُنہوں نے کہا، “ہم دوسری سیاسی جماعتوں سے بھی اپیل کرتے ہیں کہ وہ اس بات کو یقینی بنائیں کہ ووٹ تقسیم نہ ہوں۔ ہمیں امید ہے کہ ہم جلد ہی ظالموں سے چھٹکارا حاصل کر لیں گے”۔
غلام نبی آزاد کی زیرقیادت ڈیموکریٹک پروگریسو آزاد پارٹی، الطاف بخاری کی اپنی پارٹی اور سجاد لون کی سربراہی والی پیپلز کانفرنس کے اکٹھے ہونے کی خبروں کے بارے میں پوچھے جانے پر، تاریگامی نے اس اقدام پر سوال اٹھایا اور کہا، “ہمیں اپنے لوگوں کے ساتھ وفادار رہنا چاہیے تھا”۔
اُنہوں نے کہا، “وہ ایک ساتھ مل کر ایک عظیم اتحاد بنا رہے ہیں۔ کس کے خلاف؟ میں اس کا خیرمقدم کرتا اگر اِس اتحاد کا مقصد لوگوں کے حقیقی تحفظات جیسے کہ ہماری ریاست اور ہمارے زمینی حقوق کو اجاگر کرنا ہوتا۔ موجودہ حکومت نے ہمارے ساتھ جو کچھ کیا کشمیر کی تاریخ میں اس کی نظیر نہیں ملتی”۔
سی پی آئی ایم لیڈر نے کہا، “اختلافات کو ایک طرف رکھتے ہوئے، ہمیں کم از کم اپنے لوگوں کے ساتھ وفادار رہنا چاہیے تھا۔ یہ لوگوں کے حقوق کے لیے لڑائی ہونی چاہیے تھی”۔
انہوں نے کہا کہ یہ بدقسمتی کی بات ہے کہ جموں و کشمیر ہمیشہ ہی گولہ باری کا شکار رہا ہے اور یہاں کے لوگوں میں بے چینی پائی جاتی ہے۔ پاکستان اپنے دعوے خود کرتا رہا ہے اور ہمارا ملک بھارت اپنے دعوے کر رہا ہے۔ لوگوں میں بے چینی پھیلی ہوئی ہے۔ یہاں کی حکومتیں بھی کشمیری عوام کے ساتھ وفادار نہیں رہیں۔
تاریگامی نے کہا، “آج کی حکومت نے مرکز اور عوام کے درمیان معاہدے کی بنیاد کو منہدم کرنے میں کوئی کسر نہیں چھوڑی۔ ہمیں اپنے آئینی حقوق سے ہمیشہ محروم رکھا گیا ہے۔ انہوں نے (بی جے پی) دفعہ 370 کو بھی ختم کر دیا”۔
سی پی آئی (ایم) لیڈر نے کہا، ”اگر بی جے پی کے پاس کوئی واضح روڈ میپ ہوتا تو وہ آمریت کا سہارا نہ لیتے۔ انہوں نے جموں و کشمیر کو یونین کے زیر انتظام علاقہ بنا دیا۔ یہاں کے سرکاری ملازمین کی حالت زار دیکھیں۔ انہیں احتجاج کرنے کی بھی اجازت نہیں ہے… کیا آپ کو لگتا ہے کہ لوگ بی جے پی کی حمایت کریں گے؟”
تاریگامی، جو پی اے جی ڈی کے ترجمان بھی ہیں، نے کہا کہ یہ انتخابی اتحاد نہیں ہے اور ہر حلقے کے اپنے سیاسی مفادات ہیں۔
تاریگامی نے کہا کہ بی جے پی کے لیڈروں کے درمیان بھی اختلافات ہیں ہے۔
”اختلافات کے باوجود ڈی ڈی سی (ضلع ترقیاتی کونسل) کے انتخابات ایک ساتھ لڑے گئے… جموں و کشمیر کا اپنا آئین تھا لیکن اب وہ ختم ہو گیا ہے۔ ہمارا جھنڈا چلا گیا، ہمارے زمینی حقوق ختم ہو گئے، ہمارے مستقل رہائش کے حقوق ختم ہو گئے۔ ریاست بھی ختم ہو گئی“۔
پی اے جی ڈی پانچ سیاسی جماعتوں کا اتحاد ہے – نیشنل کانفرنس، پی ڈی پی، سی پی آئی (ایم)، عوامی نیشنل کانفرنس اور سی پی آئی – جو جموں و کشمیر کی خصوصی حیثیت کی بحالی کا مطالبہ کرتی ہے جسے 2019 میں دفعہ 370 کی منسوخی کے بعد بنایا کیا گیا تھا۔
تاریگامی نے کہا، “جموں و کشمیر واحد جگہ ہے جہاں گزشتہ 10 سالوں میں اسمبلی انتخابات نہیں ہوئے ہیں۔ عوام کی امنگوں کو خاطر میں لائے بغیر ریاست کو تقسیم کیا گیا”۔
انتخابی بانڈز کو ایک “بڑا گھوٹالہ” قرار دیتے ہوئے، انہوں نے بی جے پی کو نشانہ بنایا اور کہا، “اگر آپ بدعنوانی کرنا چاہتے ہیں، تو اسے قانون کے نام پر نہ کریں۔ ہم (سی پی آئی-ایم) نے انتخابی بانڈز کے زریعے ایک پیسہ بھی نہیں لیا”۔
اُنہوں نے کہا، “حقیقت میں، ہم سب سے پہلے سپریم کورٹ میں انتخابی بانڈز کے خلاف درخواست دائر کرنے والے تھے۔ لوگوں کو یہ سمجھنے میں زیادہ وقت نہیں لگانا چاہیے کہ ان دنوں ملک میں کیا ہو رہا ہے”۔
دہلی کے وزیر اعلیٰ اروند کیجریوال اور جھارکھنڈ کے سابق سربراہ ہیمنت سورین کی بدعنوانی کے مختلف معاملات میں گرفتاری پر تاریگامی نے کہا، “آئین پر حملہ ہو رہا ہے۔ جمہوریت پر حملہ ہے۔ اگر آپ کسی پارٹی کو کمزور یا توڑنا چاہتے ہیں تو ای ڈی اور سی بی آئی موجود ہیں۔ یہ ایجنسیاں حکومت کے لیے ضروری کام کرتی ہیں۔ اگر کوئی بدعنوان ہے تو وہ بی جے پی میں شامل ہو جاتا ہے”۔
وزیر داخلہ امت شاہ کے حالیہ بیان کے بارے میں پوچھے جانے پر کہ مرکزی حکومت جموں و کشمیر میں آرمڈ فورسز سپیشل پاور ایکٹ (AFSPA) کو منسوخ کرنے پر غور کرے گی، انہوں نے کہا کہ موجودہ حکومت “صرف ‘جملوں’ (جھوٹے وعدوں) پر انحصار کر رہی ہے”۔
تاریگامی نے مزید کہا، “شاہ نے کہا تھا کہ پہلے حد بندی، پھر انتخابات اور پھر ریاست کا درجہ ہوگا۔ اس کرونالوجی کو کیا ہوا؟ اگر جموں کشمیر میں حالات لوک سبھا انتخابات کے لیے سازگار ہیں تو اسمبلی انتخابات کے لیے کیوں نہیں؟ آپ پتھری بل، مژھل اور شوپیاں (فرضی) انکاﺅنٹرز کے بارے میں جانتے ہوں گے۔ ہم سب نے فورسز کو دیے گئے استثنیٰ کی مذمت کی۔ ہمیں جمہوری سیٹ اپ میں ان سخت قوانین کی ضرورت نہیں ہے”۔
