عظمیٰ ویب ڈیسک

بارہمولہ// شمالی کشمیر کے بارہمولہ ضلع میں سوپور کے سید پورہ علاقے میں بڑے پیمانے پر محاصرہ اور تلاشی آپریشن (سی اے ایس او) شروع کیا گیا ہے۔
پولیس ذرائع نے بتایا کہ محاصرہ اور تلاشی کاروائی جموں و کشمیر پولیس ، ایس او جی، فوج کی 22آرآر اور سنٹرل ریزرو پولیس فورس (سی آر پی ایف ) کی 179 بٹالین کی جانب سے مشترکہ طور پر شروع کیا گیا ہے۔
اُنہوں نے بتایا کہ محاصرہ بدھ کی دوپہر علاقے میں ملی ٹینٹوں کی نقل و حرکت کے بارے میں اطلاع ملنے کے بعد شروع کیا گیا تھا۔
پولیس ذرائع نے کہا،”محاصرہ ابھی بھی جاری ہے کیونکہ ہمارے پاس علاقے میں جنگجووں کی موجودگی کے بارے میں اطلاعات ہیں”۔
پولیس کے اعلیٰ افسران بشمول سینئر سپرنٹنڈنٹ آف پولیس (ایس ایس پی) سوپور، فوج کی 22 آر آر کے کمانڈنگ آفیسر کے علاوہ سی آر پی ایف کے اعلیٰ عہدیدار بھی موقع پر موجود ہیں۔
قابل ذکر بات یہ ہے کہ ضلع بارہمولہ میں تلاشی کی کارروائیوں میں اضافہ کیا گیا ہے اور ناکہ چیکنگ پر چوکسی گزشتہ کچھ ماہ سے تیز کردی گئی ہے جس کی وجہ سے کئی جنگجو ساتھیوں کی گرفتاری عمل میں لائی جا رہی ہے۔ بارہمولہ ضلع میں پولیس کے مشترکہ آپریشن سے جنگجووں کے کئی ماڈیولز کا پردہ فاش کیا گیا ہے۔