اوڑی دراندازی مخالف آپریشن: ملی ٹینٹ کی لاش برآمد، تلاشی آپریشن جاری

عظمیٰ ویب ڈیسک

اوڑی// شمالی کشمیر کے ضلع بارہمولہ کے اوڑی سیکٹر میں اتوار کے روز بھی ملی ٹینٹ مخالف آپریشن جاری رہا، جس دوران ایک درانداز ملی ٹینٹ کی لاش برآمد ہوئی۔
یاد رہے کہ ہفتہ کی شام فوج نے اوڑی سیکٹر میں دراندازی کی کوشش کو ناکام بنانے کا دعویٰ کیا تھا۔
اوڑی سیکٹر میں دراندازی کی کوشش ناکام بنانے کے بعد ملی ٹینٹوں کی تلاش اتوار کو بھی جاری رہی، جس دوران ایک ملی ٹینٹ کی لاش برآمد ہوئی۔
دفاعی ذرائع نے بتایا کہ ہفتے کی صبح سیکورٹی فورسز نے مصدقہ اطلاع موصول ہونے کے بعد اوڑی سیکٹر میں سرچ آپریشن لانچ کیا جس دوران وہاں پر چھپے بیٹھے ملی ٹینٹوں اور فورسز کے مابین شدید گولیوں کا تبادلہ شروع ہوا۔
ذرائع کا کہنا تھا کہ دن بھر علاقے میں رک رک کر گولیوں کا تبادلہ جاری رہا اور شام ہوتے ہی آپریشن کو اتوار کی صبح تک موخر کیا گیا۔
انہوں نے مزید بتایا کہ اتوار اعلیٰ الصبح سیکورٹی فورسز نے دوبارہ آپریشن شروع کیا ہے۔
انہوں نے بتایا کہ فوج کو مصدقہ اطلاع موصول ہوئی کہ دراندازی کے ذریعے ملی ٹینٹوں کا ایک گروپ اس طرف آنے میں کامیاب ہوا جس کے پیش نظر ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے گئے۔
دفاعی ترجمان کے مطابق علاقے میں تلاشی آپریشن ہنوز جاری ہے۔
اس سلسلے میں مزید تفصیلات کا انتظارہے۔