تازہ ترین

مُناجات

تاریخ    27 ستمبر 2020 (00 : 02 AM)   


نظرِ رحمت مجھ پہ یارب ہو سدا کے واسطے
کون ہے تیرے سوا مجھ بے نوا کے واسطے
دردِ دل میں مبتلا ہوں عافیت کیجے عطا
کر رہا ہے دل دعا تجھ سے شِفا کے واسطے
روزِ محشر جس گھڑی ہو دل پریشاں آنکھ نم
ظِلِّ ربّانی ہو مجھ بے دست و پا کے واسطے
بھر گیا ہے اب گناہوں سے مِرا ظرفِ دروں
مغفرت کر دے مِری جُود و سخا کے واسطے
میں رسولِ محترمؐ کا داغدارِ  پُر خطا
بابِ رحمت کھول دے مجھ بے نوا کے واسطے
دستگیری  کر ہمیشہ  اے خدائے لم یزل
کر عطا کچھ کام جو آئے سدا کے واسطے
دیدروئے شافعِ محشر سے کر دے فیضیاب
دل شکستہ جو کرے تجھ سے دعا کے واسطے
بھر دے یارب سینہ ٔجاہل شفائیؔ علم سے
نور بھی کر دے عطا پھر مصطفیٰؐ کے واسطے 
 
ڈاکٹر شکیل شفائیؔ
بمنہ/سرینگر