۔جموں کشمیر سرکاری زبانیں قانون2020 پارلیمنٹ میں منظور

تاریخ    24 ستمبر 2020 (00 : 02 AM)   


نیوز ڈیسک
نئی دہلی//پارلیمنٹ نے بدھ کو کشمیری، ہندی اورڈوگری زبانوں کو جموں کشمیر کی سرکاری زبانوں کی فہرست میں شامل کرنے کی بل پاس کی۔اس سے قبل انگریزی اوراردوجموں کشمیرکی سرکاری زبانوں میں شامل تھیں ۔جموں کشمیر سرکاری زبانیں بل2020راجیہ سبھا میں زبانی ووٹ کے ذریعے پاس کی تھی۔لوک سبھا نے قانون کو منگل کے روز ہری جھنڈی دکھائی تھی۔اس موقعہ پربحث میں حصہ لیتے ہوئے وزیرمملکت برائے داخلی امورجی کشن ریڈی نے کہا کہ یہ جموں کشمیرکے لوگوں کی دیرینہ مانگ تھی کہ جوزبانیں وہ بولتے ہیں انہیں سرکاری زبانوں کی فہرست میں شامل کیاجائے۔انہوں نے کہا کہ جموں کشمیر کی74فیصد آبادی کشمیری اورڈوگری زبانیں بولتے ہیں ۔انہوں نے کہا کہ حالیہ مردم شماری کے مطابق صرف0.16فیصدآبادی اردواور2.3فیصد آبادی ہندی زبانیں بولتی ہے ۔