تازہ ترین

عالمی نمبر 1 ایشلے بارٹی یو ایس اوپن سے دستبردار

تاریخ    31 جولائی 2020 (00 : 03 AM)   


یو این آئی
سڈنی؍ خواتین کی عالمی نمبر ایک آسٹریلیائی ٹینس کی کھلاڑی ایشلے بارٹی نے جمعرات کو کہا ہے کہ وہ کورونا وبائی مرض کے خدشات کے سبب اس سال یو ایس اوپن میں نہیں کھیلیں گی۔ انہوں نے کہا کہ وہ کورونا کی وبا کی وجہ سے امریکہ کا سفر نہیں کرسکتی ہیں۔ دفاعی چمپیئن بارٹی نے رواں سال فرانسیسی اوپن کے بارے میں بھی خدشات کا اظہار کیا ہے ۔ انہوں نے کہا کہ وہ جلد ہی اعلان کریں گی کہ آیا وہ اس ٹورنامنٹ میں کھیلیں گی یا نہیں۔اس سال ٹینس گرینڈ سلیم یو ایس اوپن کا انعقاد 31 اگست سے 13 ستمبر تک نیویارک میں ہونا ہے ۔ اس کے بعد فرانسیسی اوپن پیرس میں 27 ستمبر سے 11 اکتوبر تک کھیلا جائے گا۔ بارٹی نے کیریئر میں واحد گرینڈ سلیم 2019 میں فرنچ اوپن جیتا ہے جہاں انہوں نے جمہوریہ چیک کی مارکیٹا وانڈروسووا کو 6-1 ، 6[؟]3 سے شکست دی تھی۔ہیرالڈ سن اخبار کے مطابق بارٹی نے کہا کہ میری ٹیم اور میں نے فیصلہ کیا ہے کہ ہم امریکہ کا سفر نہیں کرسکتے ہیں۔ اس کی وجہ سے ویسٹرن اور ساؤدرن اوپن کے علاوہ وہ یو ایس اوپن میں نہیں کھیل سکیں گی۔ مجھے دونوں ایوینٹ بہت پسند ہیں لہذا یہ میرے لئے ایک سخت فیصلہ تھا۔ اس وقت کورونا کی وجہ سے دنیا بھر کی صورتحال ٹھیک نہیں ہے ، لہذا ٹورنامنٹ میں میری ٹیم اور میں اچھا محسوس نہیں کرتے ۔ بارٹی بعد میں فیصلہ کریں گی کہ آیا وہ اپنے فرانسیسی اوپن ٹائٹل کا دفاع کرنے کے لئے اتریں گی یا نہیں۔ انہوں نے کہا کہ میں جلد ہی فرنچ اوپن کے بارے میں اپنا فیصلہ بتاؤں گی۔ ڈبلیو ٹی اے (ویمن ٹینس ایسوسی ایشن) یورپی ٹورنامنٹ بھی ہونا ہے ۔مجھے اور میری ٹیم کو بھی اس بارے میں فیصلہ کرنا ہے ۔مردوں کی رینکنگ میں عالمی نمبر ایک سربیا کے نوواک جوکووچ نے بھی یو ایس اوپن کے بارے میں تشویش کا اظہار کیا تھا ۔ ان کا کہنا تھا کہ وہ اس فیصلے سے قاصر ہیں کہ کورونا کی وجہ سے اس سال ٹورنامنٹ میں کھیلنا ہے یا نہیں۔ جوکووچ نے کہا کہ امریکہ میں کورونا معاملوں کمی و اضافہ یو ایس اوپن کے لئے اچھا نہیں ہے ۔ اسی دوران سب سے زیادہ 20 گرینڈ سلیمز جیتنے والے سوئٹزرلینڈ کے راجر فیڈرر پہلے ہی انجری کی وجہ سے کسی ٹورنامنٹ میں نہ کھیلنے کا اعلان کرچکے ہیں۔یو این آئی