کووِڈ - 19 کیلئے مخصوص اسپتالوں میں سہولیات میں بہتری لانے کی ہدایت

فائنانشل کمشنرصحت وطبی تعلیم کاٹیسٹ عمل کومستحکم بنانے پرزور

8 اپریل 2020 (50 : 01 AM)   
(      )

نیوز ڈیسک
جموں// صحت وطبی تعلیم محکمہ کے فائنانشل کمشنر اتل ڈولو نے کورونا وائرس سے متاثرہ مریضوں کے ٹیسٹ کرنے کے عمل میں مزید استحکام لانے اور لیبارٹریوں میں بہتر سہولیات کی فراہمی پر زور دیا ہے۔اُنہوں نے جموںوکشمیر میں کووِڈ۔19کے لئے مخصوص رکھے گئے ہسپتالوں میں دستیاب سہولیات میں مزید بہتری لانے کی ہدایت دی ہے تاکہ مریضوں کو لیول ۔3کا علاج و معالجہ دستیاب رکھا جاسکے۔انہوں نے یہ ہدایات آج یہاں سول سیکرٹریٹ میں منعقد ہ ایک میٹنگ کے دوران دیں جو کووِڈ۔19 سے نمٹنے کے لئے جاری سرگرمیوں کا جائزہ لینے کے لئے طلب کی گئی تھی۔فائنانشل کمشنر نے کہا کہ مختلف مریضوں کے نمونوں کے جانچ کے عمل میں تیزی لائی جانی چاہیئے تاکہ صورتحال واضح ہوسکے ۔ٹریشری کیئر ہسپتالوں پر مریضوں کا دبائو کم کرنے کے لئے انہوں نے کہاکہ لیول۔2ہسپتالوں کو لیول ۔3 لے جانے کے لئے اقدامات کئے جانے چاہئیں۔اُنہوں نے کہا کہ لیول ۔3ہسپتالوں میں ماہر ڈاکٹر ، آئی سی یو ٹیم ، وینٹلیٹر اور دیگر سازو سامان دِن رات دستیاب رہتا ہے۔فائنانشل کمشنر کو بتایا گیا کہ ٹیسٹنگ کی گنجائش میں بہتر ی لانے کے لئے اقدامات کئے جارہے ہیں اور اس مہینے کے آخر تک اس عمل میں کئی گنا اضافہ ہوگا۔انہیں بتایا گیا کہ کشمیر یونیورسٹی کے حکام آر ٹی پی سی آر فراہم کر رہے ہیں ۔انہیں مزید بتایا گیا کہ کشمیر یونیورسٹی اور سکاسٹ کشمیر نے بالترتیب دس اور چار اہلکار فراہم کرنے کا یقین دِلایا ہے جس سے ٹیسٹنگ کے عمل میں مزید استحکام آئے گا۔ نئے میڈیکل کالجوں کے ڈائریکٹر کاڈی نیشن ڈاکٹر یشپال شرما نے ہسپتالوں کی تیاریوں پر تفصیلی رپورٹ پیش کی ۔اُنہوں نے کہا کہ جموں وکشمیر میں 16ہسپتالوں کو کووِڈ ۔19 کے لئے مخصوص کیا گیا ہے۔ انہوں نے کہا کہ جموں میں پانچ سرکاری اور تین پرائیویٹ ہسپتالوں میں آئیسولیشن سہولیات قائم کی گئی ہیں جبکہ کشمیر صوبے میں 11سرکاری ہسپتالوں میں آئیسولیشن کی سہولیات دستیاب ہیں جبکہ اس مقصد کے لئے 15پرائیویٹ نرسنگ ہوموں کی نشاندہی کی گئی ہے۔میٹنگ میں ڈائریکٹر نیشنل ہیلتھ مشن ،جی ایم سی جموں کے پرنسپل ، سی آر پی ایف ہسپتال بنتلاب جموں کے کمانڈنٹ اور دیگر افسران موجود تھے۔ڈائریکٹر سکمز کے علاوہ سری نگر ، اننت ناگ ، بارہمولہ ، راجوری ، ڈوڈہ اور کٹھوعہ کے میڈیکل کالجوں کے پرنسپلوں نے ویڈیو کانفرنسنگ کے ذریعے میٹنگ میں شرکت کی۔ایک علاحدہ میٹنگ میں فائنانشل کمشنر نے کورونا سے متاثرہ افراد کے رابطے میں آئے دیگر لوگوں کی شناخت کے عمل میں تیزی لانے پر زو ردیا۔ اُنہوں نے ڈپٹی کمشنروں کو اپنے اپنے اضلاع میں نگرانی کے عمل میں مزید تیزی لانے کی ہدایت دی۔فائنانشل کمشنر نے ہدایت دی کہ اس عمل میں کوئی بھی کوتاہی نہیں برتی جانی چاہیئے اور رابطے میں آئے تمام اَفراد کو کورنٹین میں رکھا جانا چاہیئے ۔
 

تازہ ترین