عظمیٰ ویب ڈیسک

سری نگر// جموں و کشمیر ایڈمنسٹریٹیو سروسز (جے کے اے ایس) کے 1999 بیچ کے چوبیس افسران کو جلد ہی آئی اے ایس کیڈر میں شامل کرنے کو حتمی منظوری دے دی گئی ہے، کیونکہ جموں و کشمیر انتظامیہ نے یونین پبلک سرویس کمیشن (یو پی ایس سی) اور پرسنل اینڈ ٹریننگ ڈپارٹمنٹ کی طرف سے اٹھائے گئے تمام سوالات کو کلیئر کر دیا ہے۔
۔1999 جے کے اے ایس بیچ کے افسران کو آئی اے ایس میں شمولیت کے لیے 23 سال انتظار کرنا پڑا۔
رپورٹ میں کہا گیا ہے کہ جے کے اے ایس افسران کی آئی اے ایس میں شمولیت اس وقت کی جائے گی جب یو پی ایس سی اور پرسنل اینڈ ٹریننگ ڈپارٹمنٹ یو ٹی انتظامیہ کے ساتھ اپنی میٹنگ میں شمولیت کے لیے حتمی منظوری دے دیتے ہیں۔
قابل ذکر بات ہے کہ جے کے اے ایس کے 28 افسران میں سے 16 جے کے اے ایس افسران کو گزشتہ سال آئی اے ایس میں شامل کیا گیا تھا جنہیں انڈکشن کے لیے کلیئر کیا گیا تھا۔ آٹھ خدمات سے ریٹائر ہو چکے تھے، دو نے شمولیت سے انکار کر دیا تھا جبکہ ایک کی موت ہو گئی تھی، وہیں ایک افسر سے متعلق احکامات کو سامنے نہیں لایا گیا تھاکیونکہ وہ انکوائری کا سامنا کر رہے تھے۔
سرکاری ذرائع نے بتایا کہ گزشتہ سال کی 11 آسامیوں کے علاوہ، اس سال کے لیے 13 آسامیاں دستیاب تھیں جس سے آئی اے ایس میں شمولیت کے لیے کل 24 آسامیاں دستیاب ہیں۔
جموں و کشمیر کو فی الحال آئی اے ایس افسران کی کمی کا سامنا ہے کیونکہ جے کے اے ایس افسران کی آئی اے ایس میں شمولیت گزشتہ تقریباً 12 سالوں سے سنیارٹی تنازعات، قانونی رکاوٹوں وغیرہ کی وجہ سے نہیں ہوئی تھی اور اب ان شمولیتوں سے جموں و کشمیر کو آئی اے ایس افسران کی کمی کو پورا کرنے میں مدد ملے گی۔