نئی دہلی//یو این آئی// ہندوستان اور ملائیشیا کے فوجی ایک دوسرے کے ساتھ فوجی مشق میں تقریباً دو ہفتے تک دور دراز کے جنگلوں میں اپنی جنگی مہارت کا جوہر دکھائیں گے اور اپنے اچھے تجربات اور حکمت عملیوں کا اشتراک کریں گے ۔دونوں فوجوں کے درمیان مشترکہ فوجی مشق ‘ہریماؤ شکتی 2022’ پیر کو ملائیشیا کے شہر کلانگ کے پلائی میں شروع ہوئی جو 12 دسمبر تک جاری رہے گی۔ یہ سالانہ تربیتی مشق دونوں فوجوں کے درمیان 2012 سے منعقد کی جا رہی ہے ۔اس سال فوج کی گڑھوال رائفلز رجمنٹ اور ملائیشین فوج کی رائل مالے رجمنٹ اس میں حصہ لے رہی ہیں۔ فوجی آپریشنز میں حاصل ہونے والے تجربات کو ایک دوسرے کے ساتھ شیئر کریں گے جس سے انہیں دشوار گزار جنگلاتی علاقوں میں مختلف کارروائیوں کی منصوبہ بندی کرنے اور ہدف کے حصول کے لیے ہم آہنگی بڑھانے میں مدد ملے گی۔ جنگی علاقوں میں روایتی آپریشنز کے لیے بٹالین سطح کی کمانڈ پلاننگ مشق (سی پی ایکس) اور کمپنی کی سطح کی فیلڈ ٹریننگ مشق (ایف ٹی ایکس) بھی مشق کے دوران کی جائے گی۔مشترکہ مشقوں میں بٹالین کی سطح کی لاجسٹک منصوبہ بندی کے علاوہ مشترکہ کمانڈ پوسٹ، مشترکہ نگرانی کے مرکز، فضائی وسائل کی مہارت، تکنیکی مظاہرے ، کیزولٹی مینجمنٹ اور زخمیوں کا انخلاء شامل ہے ۔ دو روزہ مشق کا اختتام مشترکہ فیلڈ ٹریننگ مشقوں، مشترکہ جنگی مباحثوں اور مشترکہ مظاہروں کے ساتھ ہوگا۔ ان میں حکمت عملی کی مہارت کو بڑھانے ، افواج کے درمیان باہمی تعاون کو بڑھانے اور فوج سے فوج کے تعلقات کو فروغ دینے پر خصوصی زور دیا جائے گا۔ہریماؤ شکتی ابھیاس‘ سے دونوں فوجوں کے درمیان دفاعی تعاون کو بڑھانے میں مدد ملے گی جس سے دو طرفہ تعلقات مزید مضبوط ہوں گے ۔
