’ کھیلو انڈیا‘ مہم کا جائزہ لیا گیا

نیوز ڈیسک

سرینگر//لیفٹیننٹ گورنر منوج سِنہا نے سول سیکریٹریٹ میں کھیل سرگرمیوں کا جائزہ لینے کے لئے ایک اعلیٰ سطحی میٹنگ کی صدارت کی۔ اُنہوں نے اِس برس کے لئے 35 لاکھ نوجوانوں کو کھیل سرگرمیوں میں شامل کرنے کی کوششوں کا تفصیلی جائزہ لیا۔جموںوکشمیر سپورٹس کونسل او رمحکمہ یوتھ سروسز اینڈ سپورٹس کو ہدایت دی گئی کہ وہ نوجوانوں میں جرائم اور منشیات کے اِستعمال کو روکنے کے لئے کھیلوںکی طاقت کا استعمال کریں۔لیفٹیننٹ گورنر نے کہا کہ کھیلوں میں لڑکیوں کی زیادہ سے زیادہ شرکت کو یقینی بنایا جائے ۔

 

 

کھیل سرگرمیوں کو مزید جامع بناکر خواتین کھلاڑیوں کو فروغ دینے کے لئے کوششیں تیز کریں، ہمیں لڑکیوں کی مساوی شرکت کو فروغ دینا چاہیے اور اِس بات کو یقینی بنانا چاہیے کہ ان کے پاس ٹیم ورک ، خود انحصاری اور اعتماد پیدا کرنے کے کافی مواقع ہوں ۔ اُنہوں نے کہا کہ کھیل معاشرے کو بدلنے کی طاقت رکھتا ہے اور ہمیںاِس کی بے مثال صلاحیت کا اِستعمال کرنا چاہیے۔اُنہوں نے اَفسران کو یوگا سینٹر وں کے لئے سہولیات تیار کرنے اور اَضلاع میں ریلیوں کے اِنعقاد کے طریقۂ کار کو تلاش کرنے کی بھی ہدایت دی۔لیفٹیننٹ گورنر نے کہا کہ سپورٹس کوٹا کے تحت کام کرنے والے ملازمین کی شناخت کے لئے تجزیاتی نقطہ نظر اِختیار کیا جانا چاہیے جو جموںوکشمیر میں کھیلوں کی ترقی میں اَپنا حصہ اَداکر سکتے ہیں۔لیفٹیننٹ گورنر کو ’’ مائی یوتھ مائی پرائیڈ‘‘ کے تحت سرگرمیوں کے کیلنڈر کا جائزہ لیتے ہوئے جانکاری دی گئی کہ پروگرا م کے مرحلہ اوّل میں پورے جموںوکشمیر یوٹی سیء 8.76 لاکھ نوجوانوں کی شرکت دیکھی گئی ہے جبکہ مرحلہ دوم میں 13.75 لاکھ نوجوان شامل ہوں گے۔میٹنگ کو ’’ مائی یوتھ مائی پرائیڈ‘‘ کے تحت 25,000 نوجوانوں کے ساتھ اہم بین الاقوامی دِنوں کی یاد میں منعقد کی جانے والی خصوصی سرگرمیوں کے بارے میں بتایا گیا۔

 

سپورٹس پالیسی کے مطابق ان کھلاریوں کو اَنعامات دئیے جارہے ہیں جنہوں نے ملک او رجموںوکشمیریوٹی کا نام روشن کیا ہے۔اُنہوں نے پرنسپل سیکرٹری اعلیٰ تعلیم محکمہ روہت کنسل سے کہا کہ وہ اعلیٰ تعلیم کی سطح پر نوجوانوں کو مختلف کھیلوں کے مضامین میں حصہ لینے کی ترغیب دیں۔لیفٹیننٹ گورنر نے پی ایم ڈی پی ، جے کے آئی ڈی ایف سی ، کیپکس او رکھیلو اِنڈیا کے تحت جاری پروجیکٹوں کے بارے میں مطلع کئے جانے پر اَفسران سے کہا کہ وہ زمین یا دیگر مسائل کا سامنا کرنے والے پروجیکٹوں کی نشاندہی کریں تاکہ ان کو حل کرنے کے لئے مناسب کاررِوائی کی جاسکے۔اُنہوں نے محکمہ یوتھ سروسز اینڈ سپورٹس کو ہدایت دی کہ وہ ایل جی کی رولنگ ٹرافی کے تحت کرکٹ ، فٹ بال ، والی بال او رہاکی سمیت متعدد شعبوں میں کھیلوں کے ٹورنامنٹس کا اِنعقاد کرے اور جموںوکشمیر یوٹی سطح اور ضلعی سطح پر نمایاں کھلاڑیوں کو اَنعامات سے نوازے۔