یو این آئی
سرینگر// سرینگر کے گنجان آبادی والے علاقے پتلی پورہ چھتہ بل میں آگ کی ایک ہولناک واردات کے دوران چار مکانات خاکستر ہوگئے ۔ آگ بجھانے کی کارروائی کے دوران فائر مین سمیت تین افراد بھی زخمی ہوگئے۔ اتوار کی صبح دس بجے کے قریب پتلی پورہ چھتہ بل میں ایک رہائشی مکان سے اچانک آگ نمودار ہوئی جس نے آناً فاناً اپنے متصل مزید تین مکانوں کو لپیٹ میں لے لیا۔مقامی لوگوں اور فائر اینڈ ایمرجنسی عملے کی بروقت کارروائی کے نتیجے میں اگرچہ آگ پر قابو پالیا گیا تاہم آتشزدگی کی اس واردات کے دوران چار مکانات پوری طرح خاکستر ہوگئے جن میں موجود لاکھوں روپئے مالیت کا سازو سامان بھی تباہ ہوا۔لوگوں نے بتایا کہ آگ کی اس واردات کے دوران حفیظہ ، ریاض احمد بٹ اور شبیر احمد بٹ سمیت چار افراد کے رہائشی مکانات خاکستر ہوگئے۔معلوم ہوا کہ حفیظہ نامی خاتون کے رہائشی مکان میں موجود طلائی زیورات بھی راکھ کے ڈھیر میں تبدیل ہوگئے۔فائر اینڈ ایمرجنسی محکمہ کے ایک سینئر عہدیدار نے بتایا کہ چھتہ بل کے پتلی پورہ میں اتوار کی صبح آگ نمودار ہونے کی اطلاع موصول ہوتے ہی فائر ٹینڈر جائے موقع پر پہنچے۔انہوں نے کہاکہ گنجان آبادی کے باوجود بھی فائر اینڈ ایمرجنسی عملے نے اپنی جانوں کو جوکھم میں ڈال کر آگ بجھانے کی کارروائی شروع کی تاہم گیس سلنڈر پھٹ جانے سے آگ نے شدت اختیار کی۔انہوں نے کہاکہ آگ بجھانے کی کارروائی کے دوران فائر سروس کے انچارج خاتون سمیت تین افراد زخمی ہوئے جنہیں علاج ومعالجہ کی خاطر نزدیکی ہسپتال منتقل کیا گیا۔انہوں نے بتایا کہ آگ کی اس واردات کے دوران تین مکانات خاکسترہوگئے جبکہ ایک کو جزوی طور نقصان پہنچا۔دریں اثناء پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی۔یو این آئی
صدر ہسپتال کے ایمرجنسی شعبہ کے وارڈ میں آگ | معمول نوعیت کا شارٹ سرکیٹ تھا | سب محفوظ ہے:میڈیکل سپر انٹنڈنٹ
پرویز احمد
سرینگر// صدرہسپتال سرینگرکے شعبہ ایمرجنسی و حادثات کے ایک وارڈ میں اتوار کو اس وقت سنسنی پھیل گئی جب وارڈ میں شارٹ سرکیٹ کی وجہ سے آگ نمودار ہوئی۔ وارڈ میں موجود تیمارداروں اور عملہ نے فوراً مریضوں کوباہر نکالا جبکہ محکمہ فائر اینڈ ایمرجنسی کی بھر وقت کارروائی سے آگ کو پھیلنے سے روک لیا گیا۔ میڈیکل سپر انٹنڈنٹ صدر ہسپتال سرینگر ڈاکٹر مظفر زرگر نے کشمیر عظمیٰ کو بتایا کہ ایک وارڈ میں شارٹ سرکیٹ کی وجہ سے آگ نمودار ہوئی تھی لیکن عملہ کی بھروقت کارروائی سے آگ کو پھیلنے سے روک لیا گیا۔ انہوں نے کہا کہ آگ وارڈ میں لگی تھی اس وجہ سے زیادہ کوئی نقصان نہیں ہوا ۔ انہوں نے کہا کہ تمام مریض اور تیماردار محفوظ ہیں اور کسی کو کوئی چوٹ نہیں آئی ۔
