پاکستان کے خلاف سیریز نیوزی لینڈ نے ثقلین مشتاق کو بطور کنسلٹنٹ ٹیم میں شامل کرلیا

نئی دہلی//پاکستان اور نیوزی لینڈ کے درمیان 14 اپریل سے 5 ٹی ٹوینٹی اور 5 ون ڈے میچوں کی سیریز کھیلی جائے گی۔ کیوی ٹیم نے پاکستان کی کمزوریوں کو پکڑ کر شکست دینے کیلئے سیریز سے پہلے بڑا فیصلہ کیا ہے۔ میڈیا رپورٹس کے مطابق نیوزی لینڈ نے اس سیریز کیلئے پاکستان کے سابق ہیڈ کوچ ثقلین مشتاق کو بطور کنسلٹنٹ ٹیم میں شامل کرنے کا فیصلہ کیا ہے۔ نیوزی لینڈ نے گزشتہ دسمبر – جنوری میں پاکستان کا دورہ کیا تھا۔ اس وقت دونوں ٹیموں کے درمیان 2 ٹیسٹ میچ اور 3 ون ڈے میچز کھیلے گئے تھے۔ ٹیسٹ سیریز ڈرا رہی تھی جبکہ کیویز نے ون ڈے میں 2-1 سے کامیابی حاصل کی تھی۔ تب پاکستان کے ہیڈ کوچ ثقلین مشتاق تھے۔ اب جب نیوزی لینڈ کی ٹیم اپنا نامکمل دورہ مکمل کرنے کیلئے پاکستان پہنچنے والی ہے تو تصویر بالکل بدل چکی ہے۔ ثقلین مشتاق اس مرتبہ کیویز کے ساتھ مل کر پاکستان کو شکست دینے کی حکمت عملی بنائیں گے۔ میڈیا رپورٹس کے مطابق ثقلین مشتاق نے نیوزی لینڈ کرکٹ بورڈ کی پیشکش قبول کر لی ہے۔ پاکستانی ٹیم کے ساتھ طویل عرصے تک کام کرنے والے ثقلین مشتاق آئندہ سیریز میں بابر اعظم کے لئے مشکلات پیدا کر سکتے ہیں۔ وہ پاکستان کی خوبیوں اور خامیوں سے بخوبی واقف ہیں۔ ثقلین مشتاق کو 2021 میں پاکستان ٹیم کا ہیڈ کوچ بنایا گیا تھا۔ رمیز راجہ کے جانے اور نجم سیٹھی کے پاکستان کرکٹ بورڈ کے چیئرمین بننے کے بعد ثقلین مشتاق کی چھٹی طے سمجھی جا رہی تھی۔