نوا ب بازار علاقے میں کہرام ۔2بچوں کے والد کی لاش نوگام میں برآمد، قتل کا الزام

 ارشاد احمد

سری نگر//سری نگر کے ٹنگن بائی پاس نوگام میں بدھ کی صبح 28سالہ نوجوان کی لاش پراسرار حالت میں برآمد ہوئی اور بعد ازاں اس کی شناخت سہیل احمد ساکن نواب بازار کے بطور ہوئی۔اہل خانہ نے الزام لگایا کہ سہیل احمد کا بے دردی کے ساتھ قتل کیا گیا ہے اور اس کے سر پر گہری چوٹ صاف نظر آرہی تھی۔بدھ کی صبح ٹنگن بائی پاس کے نزدیک ایک نوجوان کی لاش پر اسرار حالت میں برآمد ہوئی جس کے بعد پولیس نے لاش کو تحویل میں لے کر اس کی شناخت 28سالہ سہیل احمد ساکن نوابازار سر ی نگر کے بطور کی۔قانونی اور طبی لوازمات پورے کرنے کے بعد لاش کو وارثین کے سپرد کیا گیا۔جوں ہی سہیل احمد کی لاش نوابازار سری نگر پہنچائی گئی تو وہاں کہرا م مچ گیا ، خواتین سینہ کوبی کرنے لگیں اور پورا علاقے ماتم کدے میں تبدیل ہوگیا۔اہل خانہ نے الزام لگایا کہ سہیل احمد کا قتل کیا گیا ہے۔انہوں نے کہاکہ سہیل احمد دو بچوں کا والد تھا۔ان کے مطابق گزشتہ روز گھر سے نکلا تب سے اْس کو موبائیل فون سوچ آف آرہا تھا۔انہوں نے یہ بھی بتایا کہ سہیل احمد کے سر پر گہری چوٹ تھی جو اس بات کا ثبوت ہے کہ ہمارے لخت جگر کا بے دردی کے ساتھ قتل کیاگیا ہے۔اہل خانہ نے مزید بتایا کہ سہیل احمد جس سکوٹی پر نکلا تھا وہ غائب ہے۔انہوں نے ضلعی انتظامیہ اور پولیس سے مطالبہ کیا کہ سہیل احمد کے قتل میں ملوث افراد کو جلد ازجلد بے نقاب کیا جائے۔دریں اثنا پولیس نے اس ضمن میں کیس درج کرکے مزید تحقیقات شروع کی۔