ایم ایم پرویز
را م بن//سری نگر جموں قومی شاہراہ جمعہ کو ہلکی اور درمیانی مسافر گاڑیوں کے دو طرفہ ٹریفک اور کشمیر کیلئے بھاری گاڑیوںکے یک طرفہ ٹریفک کیلئے کھلی رہی۔تاہم، ٹریفک حکام نے بتایا کہ گزشتہ 24 گھنٹوں کے دوران شام 5 بجے تک، جمعہ کو سری نگر جموں ہائی وے پانچ گھنٹے 34 منٹ تک بند رہی۔انہوں نے بتایا کہ بانہال-قاضی گنڈ سرنگ کے بند ہونے کی وجہ سے شاہراہ دو گھنٹے 18 منٹ تک اور چنانی-ناشری ٹنل کے بند ہونے کی وجہ سے ایک گھنٹہ 51 منٹ تک، ڈلواس اور کیفے ٹیریا میں گڑھے بھرنے کی وجہ سے ایک گھنٹہ 25 منٹ تک بند رہی۔ انہوں نے مزید کہا کہ ناشری اور بانہال سرنگوں کے درمیان مختلف مقامات پر چھ بھاری گاڑیوں کے ٹوٹنے اور خانہ بدوشوں اور ان کے مویشیوں کی پیدل نقل و حرکت کی وجہ سے ٹریفک کی نقل و حرکت سست ہے۔
رام بن میں ٹریفک کے ضابطے کی نگرانی کرنے والے ٹریفک حکام نے بتایا کہ دن کے وقت سینکڑوں نجی کاریں، مسافر لائٹ، اور درمیانی اور بھاری گاڑیاں شاہراہ کے ناشری-بانہال سیکٹر کو عبور کر کے اپنی اپنی منزلوں کے لیے پہنچی ہیں۔ان کا کہنا تھا کہ ہائی وے پر ٹریفک کی بھاری روانی دیکھی گئی۔انہوں نے کہا کہ جکھینی ادھم پور سے چھوڑی گئی بھاری گاڑیاں اب بھی شاہراہ کے رام بن-بانہال سیکٹر کو سست رفتاری سے پار کر رہی ہیں۔ان کا کہنا تھا کہ جمعہ کی شام اس علاقے میں بارش کا ایک تازہ سلسلہ شروع ہوا تاہم ہائی وے کھلی ہے۔قبل ازیں حکام نے بتایا کہ جموں سری نگر نیشنل ہائی وے ناشری اور بانہال کے درمیان ضروری مرمت اور دیکھ بھال کے کاموں کے لیے جمعہ کی رات 10 بجے سے صبح 6 بجے تک ہر قسم کی گاڑیوں کے لیے بند رہے گی۔رات 10 بجے یہ رپورٹ درج ہونے تک شاہراہ کھلی ہے اور بھاری گاڑیاں سست رفتاری سے کشمیر کی طرف جا رہی ہیں۔
