نعت پاک
میرے آقاﷺ بہار لے آئے
رنگ اُجلے ہزار لے آئے
ٹہنی،ٹہنی پہ تازگی آئی
رحمتوں کی پھوار لے آئے
رشکِ جنت بنادیا صحرا
کیا فضا خوشگوار لے آئے
تُجھ سے زرّوں نے بھی ضیا پائی
تازہ لیل و نہار لےآئے
دے کے قرآن کا ہمیں تحفہ
نعمتِ شاہ کار لے آئے
جاں کے دُشمن کو بھی اماں بخشی
کتنا اچھا شعار لے آئے
قلب پہ وار کردیا ایسا
عمرؓ کو اشک بار لے آئے
گلہ بانوں کو آگہی بخشی
رِفعتیں بے کنار لے آئے
حق نے بخشا عروجِ لا ثانی
آسمانوں سے پار لے آئے
بند مٹھی میں بولتے پتھر
سنگبازوں کی ہار لے آئے
دور دُختر کُشی کا ختم ہوا
بیٹیوں کا وقار لے آئے
درِ اقدس پہ حاضری بسملؔ
ساعتِ یاد گار لے آئے
خورشید بسملؔ
تھنہ منڈی راجوری
موبائل نمبر؛9086395995
نعت شریف
میرے حضور کو کبھی تم نے پڑھا ہے کیا
قرآن کھول کر ذرا دیکھو لکھا ہے کیا
کرتے نہیں عمل ہیں جو حقوق العباد پر
اُن کا مرے نبیؐ سے کوئی رابطہ ہے کیا
بخشش کی تو کریں گے سفارش خدا سے وہ
سنت پہ اُن کی تم نے عمل بھی کیا ہے کیا
کانٹے بچھائے راہ میں دشمن نے آپ کی
لیکن کسی سے آپ نے بدلہ لیا ہے کیا
تاریخ اُٹھا کے دیکھ لو دنیا میں آج تک
اتنا بڑا کسی کو بھی رتبہ ملا ہے کیا
اک بار خواب میں میرے آجایئے حضورؐ
ارمان میرا اور بھی اس کے سوا ہے کیا
کیا کیا نہیں لکھا گیا ہے اُن کی شان میں
میں گر لکھوں تو لوگ کہیں گے لکھا ہے کیا
آنسو نکل پڑے تری آنکھوں سے کیوں بتا
نعتِ رسولِ پاک کو تو نے لکھا کیا
اُن کی صفات کو بیاں کرنے کے واسطے
راشدؔ کو لفظ کوئی لُغت میں مِلا ہے کیا
راشدؔؔ احمد راشد
حیدرآباد آندھرا پردیش
موبائل نمبر؛9951519825
رحمتِ کل جہاں
آگئے آگئے رحمتِ کُل جہاں
بھر گئیں فرحتوں سے سبھی بستیاں
يومِ فرحت منایا یہاں اور وہاں
ڈھک گیا ابرِ رحمت سے سب آسماں
رس فضاؤں میں اُلفت کے گُھلنے لگے
گیت صل علیٰ کے رواں ہو گئے
حسنِ اخلاق کی جب کھلیں کھڑکیاں
بدظنوں کے دلوں پر چلیں برچھیاں
منہ چھپانے لگیں تھیں بد اخلاقیاں
سر اٹھا کر چلیں ساری اچھائیاں
گرد آلود ذہنوں کے ملبے ہٹے
بیٹیوں کے بھی جینے کے رستے کھلے
بے زبانوں کی بن کے وہ آیئے زباں
نا توانوں کی بن کے وہ آئے تواں
پر مسرت سے کھولے اُڑیں تتلیاں
مدحِ آقا سنانے لگیں مچھلیاں
سب مسرت کے پیکر میں ڈھلنے لگے
وجہِ رشکِ چمن دشت و صحرا بنے
تیرگی ہی رہی اور نہ آہ و فغاں
سر پٹکنے لگیں ظلم کی آندھیاں
چھائیں ایسی بہاریں جو ہیں بے خزاں
کون کر پایا اوصاف انکے بیاں
بتکدوں میں محمدؐ کے ڈنکے بجے
منہ کے بل بو جہل کے خدا گر پڑے
کُھل کے ہونے لگی مسجدوں میں ازاں
بس گئیں درس و تبلیغ کی بستیاں
عبد و معبود میں آئیں نزدیکیاں
آسماں اور زمیں کی مٹیں دوریاں
اے قمر انؔ کے آ نے سے روشن ہوئے
ہر طرف رب کی وحدانیت کے دیئے
عمران قمر
رمیش پارک ، لکشمی نگر دہلی
موبائل نمبر؛ 8920472523
آمنہ کا لال آگیا
بھٹکے ہوئے راہیوں کو راستہ دِکھانے کو
ہر اندھیرے ذہن میں اِک دِیا دلانے کو
ہر پیاسی رُوح کی تشنگی مَٹانے کو
اور خُدا کی رحمتیں اِس زمیں پہ لانے کو
صاحبِ کمال آگیا۔ آمنہ کا لال آگیا
اِس زمیں کو اِنتظار تھا، آسماں بھی بے قرار تھا
ذہن و دِل میں انتشار تھا، اور بالائے شمارتھا
دائی حلیمہ کے خوشیاں منانے کو
بدلےمیں رحمت کا اِنعام پانے کو
لمحہ بے مثال آگیا۔ آمنہ کا لال آگیا
زندگی کو دِلکشی ملے، تیرگی کو روشنی مِلے
بِونوں کو قدآوری ملے، سب کو اِک برابری ملے
پرچم مساوات اونچا اُٹھانے کو
رنگ نسل بھید سارے جڑ سے مٹانے کو
آقائے بِلالؔ آگیا۔ آمنہ کا لال آگیا
خُشک تھی فضا بدل گئی، بہہ رہی ہوا بدل گئی
سِیرتِ رِدا بدل گئی، موت راستہ بدل گئی
لوٹے ہیں پنچھیؔ بھی آشیاں سجانے کو
مصطفےٰ ؐ کا جشنِ ولادت منانے کو
سب پہ اِک جلال آگیا۔ آمنہ کا لال آگیا
سردار پنچھیؔ
جیٹھی نگر، مالیر کوٹلہ روڑ، کھنہ پنجاب
موبائل نمبر؛9417091668
نعت پاک
ہے آج دن کی طرح رات مصطفٰےآئے
کہ لے کے نور کی برسات مصطفٰےآئے
گِناؤں کیسے میں آمدکے فیض،کہ دیتے
ہر ایک چیز کو برکات مصطفٰےآئے
سنا ہے تم نےکہ انسانی جسم میں اک شب
خدا کی کرکے ملاقات مصطفٰےآئے
جہان و زیست کی تاریکی جو کرے روشن
وہ بن کے نور کی اک ذات مصطفٰےآئے
کرم تو دیکھئے ہم عاصیوں کو دینے کو
بہشتوں حوروں کی سوغات مصطفٰےآئے
دکھا کے معجزے گاہے بہ گاہے زندہ باد
مٹانے زورِ طلسمات مصطفٰےآئے
جہاں میں رحمتیں عنقا بہت ہی عنقا تھیں
انھیں کی کرنےکو بہتات مصطفٰےآئے
ہاں آؤ آؤ عزیزو کہ ہم سبھی گائیں
درودِ پاک کے نغمات مصطفٰےآئے
ذکیؔ جو کانوں میں پڑتے ہی روح گرما دیں
ماںلبوں پہ رکھ کے وہ آیات مصطفٰےآئے
ذکی طارق بارہ بنکوی
سعادتگنج۔بارہ بنکی،یوپی۔بھارت
موبائل نمبر؛7007368108
نعت رسول مقبولؐ
بالا ہے عقل و فہم سے عظمت رسولؐ کی
کیسے کروں جہان میں مدحت رسولؐ کی
خوش آج زمانے میں ہے امت رسولؐ کی
ہر سو سجی ہے بزمِ ولادت رسولؐ کی
سنگِ گراں سے کم نہیں وہ دل اے مومنو!
رہتی نہیں ہے جس میں محبت رسولؐ کی
بندہ وہی تو ایک ہے اللہ کو پسند
کرتا جو شوق سے ہے اطاعت رسولؐ کی
قطروں کی تھی طلب مجھے دریا کیا عطا
اللہ رے یہ کیسی سخاوت رسولؐ کی
لکھنے کا یہ شعور ، یہ الفاظ ،یہ کلام
اللہ کی قسم ہے عنایت رسولؐ کی
شادابؔ غم نہ کھا کوئی محشر میں دیکھنا
ہوگی نصیب تجھ کو شفاعت رسولؐ کی
شفیع شادابؔ
پازلپورہ شالیمارسرینگر کشمیر
موبائل نمبر؛9797103435
توصیفِ آنحضورؐ
انسانیت پہ تا ابد احسان کرگیا
واحد خدا کے دین کا اعلان کرگیا
بتلا دیئے انساں کو ہیں اسرارِ بندگی
سفرِ حیات، تاابد آساں کرگیا
دل جو زُباں سے ہوچُکے یکسر تھے دُور دُور
اک جنبشِ اخلاق سے یکجان کرگیا
مقہور تھے جو دم بہ دم مجبور ہر قدم
دستِ سخا سے اُن کو ہے، سلطان کرگیا
بستر تھا ٹوٹا بوریا کھانا کھجور تھا
آرامِ جاں بھی اپنا وہؐ قربان کرگیا
کیسے کروں بیان میں توصیفِ آنحضورؐ
توصیف بیاں جن کی ہے، رحمٰن کرگیا
طفیل ؔشفیع
حیدرپورہ سرینگر
موبائل نمبر؛6006081653
نعت نبیؐ
قریہ قریہ باعثِ رحمت رسولِ ہاشمیؐ
زندگی کا طرئہ عظمت رسولِ ہاشمی
گونجتا ہے آپ کی اک ذاتِ اقدس کے طُفیل
شش جہت میں نعرئہ وحدت رسولِ ہاشمیؐ
تا ابد ہے شادماں جس کو نصیبوں سے ملی
روح پرور آپ کی صحبت رسولِ ہاشمیؐ
زندگی کا ہر قدم اک آزمائش ہو تو ہو
عاشقوں کے ضامنِ نُصرت رسولِ ہاشمیؐ
ہر کسی سے پیار کے اخلاص کے داعی مگر
امرِ حق میں قائلِ شدت رسولِ ہاشمیؐ
غم کے بادل کیا بگاڑیں گے کہ جب تک پاس ہو
مہرِ تاباں آپ کی سیرت رسولِ ہاشمیؐ
رفتہ رفتہ عشق میں مجھ پر کُھلا انظرؔ حسن
پھول ہے دنیا اگر نکہت رسولِ ہاشمی
حسن انظرؔ
بمنہ، سرینگر، کشمیر
ولادت حضرت محمد مصطفیٰ ؐ
آمنہ کی گود میں روشن ہوا ہے آفتاب
اور حلیمہ کو خدا نے کردیا ہے فیضیاب
دینِ حق نورِ نبّی سے یوں منّور ہوگیا
صبحِ صادق نے اندھیروں سے ہٹایا ہے حِجاب
تیری آمد سے معطر ہوگیا سارا جہاں
تیرے در پہ روبہ سجدہ ہورہا ہے آفتاب
یا نبّی آمد پہ تیری بُجھ گیا آتشکدہ
تیری عظمت ہے نمایاں اِنکساری لاجواب
آپ کی آمد پہ نازاں ہے یہ ساری کائنات
ہو مسلمانو مبارک کُھل گیا رحمت کا باب
تیرے در سے فیض لیتے انبیاء اور مرسلین
رنج وغم کا ہے مداوا اے مظفر ؔآنجنابؐ
حکیم مظفرحسن مظفرؔ
باغبان پورہ، لعل بازار
موبائل نمبر؛9622171322
نعت
بحرِ جود و سخا کی آمد ہے
یعنی کہ مصطفیٰ کی آمد ہے
رحمتیں برکتیں ہیں چھائی ہو ئیں
سید الانبیاء کی آمد ہے
مرحبا جو ہیں صاحبِ لولاک
اُس حبیبِ خدا کی آمد ہے
اے حلیمہ تمہارے آنگن میں
سرورِ دوسرا کی آمد ہے
مرحبا صورت محمدﷺمیں
مظہر کبریا کی آمد ہے
ہوچراغاں نہ کیوں جہاں بھر میں
نورِ رب العلیٰ کی آمد ہے
اب بھٹکنے کا غم کریں کیونکر
رہبر و رہنما کی آمد ہے
تیرگی منھ چھپائے ہے پھر تی
ذاتِ شمش الضحٰی کی آمد ہے
رشک فرماؤ، جھومو ،ناز کرو
درد والو دوا کی آمد ہے
زاہدؔ آؤ منائیں جشنِ طرب
خاتم الانبیاء کی آمد ہے
محمد زاہدؔ رضابنارسی
دارالعلوم حبیبیہ رضویہ
گوپی گنج، بھدوہی ،یوپی
رسولِ کریم ﷺ
فخرِ کون و مکاں رسولِ کریم
گویا شاہِ شاہاں رسولِ کریم
اللہ اللہ ہے بے مثال و نظیر
جانِ ارض و سماں رسولِ کریم
درج خُلقِ عظیم بابِ کتاب
قند و شیریں بیاں رسولِ کریم
نور افروز رشکِ حور و چمن ہے
زینتِ لامکاں رسولِ کریم
شَق اشارے سے چاند کرتا گیا ہے
معجزئہ خود نہاں رسولِ کریم
وہ ہدایت کا چشمہ روحِ لطیف
رحمتِ دو جہاں رسولِ کریم
شانِ حسن و جمال، شافعِ حشر
دلؔ کے جانِ جہاں، رسولِ کریم
عادلؔ حُسین
راجپورہ پلوامہ
موبائل نمبر؛7889841414
