جموں//چیف سیکرٹری ڈاکٹر ارون کمار مہتا نے آج تمام شراکت داروں پر زور دیا کہ وہ جموںوکشمیر میں صد فیصد آدھار کی رَسائی کو مکمل کریں۔چیف سیکرٹری سول سیکرٹریٹ میں آدھاررسائی کا جائزہ لینے کے لئے منعقدہ میٹنگ کی صدارت کررہے تھے۔ڈاکٹر ارون کمار نے اَفسران سے کہا کہ آدھار ہر شہری کی ایک منفرد شناخت ہے جس سے وہ کسی بھی سرکاری خدمات کو بغیر کسی پریشانی کے حاصل کرسکتے ہیں۔ اُنہوں نے تمام ضلع ترقیاتی کمشنروں کو ہدایت دی کہ وہ آدھار سیچوریشن کو مشن موڈ میں لیں تاکہ لوگوں کو مؤثر اور عوامی خدمات فراہم کی جاسکیں۔چیف سیکرٹری نے ضلع ترقیاتی کمشنروں کو ہدایت دی کہ وہ آدھار سٹیشنوں کے زیادہ سے زیادہ استعمال کے لئے دوبارہ تعیناتی کا منصوبہ تیار کریں تاکہ صد فیصد رَسائی حاصل کی جاسکے۔ اُنہوں نے مزید ہدایت دی ،’’ بیداری مہم ، مقامی نمائندوں کے ذریعے لوگوں کو آدھار سٹیشنوں پر لایا جائے ۔‘‘اُنہوں نے مزید ضلع ترقیاتی کمشنروں سے کہا کہ وہ باقاعدگی سے ضلع سطح کی آدھار مانیٹرنگ کمیٹی میٹنگ منعقد کریں تاکہ اِضافی اِندراج اور اَپ ڈیٹ مراکز کی ضرورت کا بروقت جائزہ لیا جاسکے اور ان مراکز کی دستیابی کو یقینی بنایا جاسکے۔اُنہوں نے اَفسران کو ہدایت دی کہ وہ تمام ضلع ہسپتالوں میں اِس ماہ کی 15 تاریخ تک آدھار منسلک برتھ رجسٹریشن ( اے ایل بی آر ) شروع کریںاور اس کے بعد اِس ماہ کے آخیر تک پورے جموںوکشمیر میں سول رجسٹریشن سسٹم ( سی آر ایس ) شروع کریں۔میٹنگ میں کمشنر سیکرٹری اِنفارمیشن ٹیکنالوجی نے بتایا کہ جموںوکشمیر میں گذشتہ ایک برس سے مجموعی طور پر آدھار کی 81 فیصد سے بڑھ کر 89 فیصد ہو گئی ہے اور آج تک تقریباً 1.21 کروڑ آدھار بن چکے ہیں۔ اُنہوں نے میٹنگ کو مزید بتایا کہ جموںوکشمیر یوٹی بھر میں آپریشنل آدھار مراکز کی تعداد 331 سے بڑھ کر 1,105 ہوگئی ہے جس کے ساتھ جنوری 2023 ء سے اِضافی 250 اِندراج سٹیشنوں کو آپریشنل کیا جارہاہے ۔دریں اثنا، ڈاکٹر ارون کمار مہتا نے مرکزی وزارت مواصلات کے یونیورسل سروس او بلیگیشن فنڈ کے تحت جموںوکشمیر کے 410 مقامات پر بی ایس این ایل کے 4جی کنکٹیویٹی سیچوریشن کی پیش رفت کا بھی جائزہ لیا۔میٹنگ میں چیف سیکرٹری نے تمام ضلع ترقیاتی کمشنر وں کو ہدایت دی کہ وہ اِن سائٹس کی اَراضی کو تیزی سے بی ایس این ایل کو منتقل کریں تاکہ جموںوکشمیر کے تمام دُور دراز علاقوں کو بہتر رابطہ فراہم کیا جاسکے ۔چیف سیکرٹری نے مزید ضلع ترقیاتی کمشنر اور بی ایس این ایل کے افسران کو حکم دیا کہ وہ ایک ہفتے کے اندر زیراِلتوأ جگہوں کا مشترکہ سروے کریں تاکہ ٹاوروں اور دیگر بنیادی ڈھانچے کے قیام کا کام بروقت شروع ہوسکے ۔
