۔36گھنٹوں پر محیط لیتہ پورہ معرکہ آرائی 8ہلاکتوں پر اختتام پذیر

اونتی پورہ +پلوامہ//لیتہ پورہ اونتی پورہ میں 36گھنٹوں سے جاری فدائین حملہ سو موار سہ پہر کوایک اور جنگجو کی ہلاکت پراختتام پذیر ہوا ۔ اس فدائین حملے میں سی آر پی ایف کے ایک افسر سمیت پانچ اہلکاراور تین فدائین جاں بحق ہوئے ۔اس دوران دربہ گام میں پر تشدد احتجاج کے دوران فورسز نے ایک مظاہرین کو گولی مار دی جس کی حالت انتہائی نازک قرار دی جارہی ہے۔جنگجوئوں کی ہلاکت کیخلاف پلوامہ اور شوپیان اضلاع میں مکمل ہڑتال رہی جس کے دوران انٹر نیٹ سروس معطل رہی اور ریل سروس بھی بند رہی۔لیتہ پورہ میں قائم 185بٹالین سی آر پی ایف کیمپ کے گروپ سنٹر پر36گھنٹوں سے جاری فدائین حملہ سو موار کے روز تین بجے کے قریب چار اہلکار، ایک افسر اور تین جنگجوئوں سمیت آٹھ ہلاکتوں کے ساتھ اختتام پذیر ہوا ۔اتوار کی شام ایک عمارت اڑانے کے دوران وہاں موجود ایک جنگجو پھر سے نمودار ہوا تھا جس کے خلاف آپریشن کو پیر کی صبح تک ملتوی کیا گیا۔ پیر کی صبح مذکورہ جنگجو ے خلاف دوبارہ آپریشن کیا گیا اور طرفین کے درمیان فائرنگ کا تبادلہ ہوتا رہا اور بیچ بیچ میں زور دار دھماکے بھی سنے گئے۔قریب تین بجے مذکورہ جنگجو کو بھی مارا گیا اس کے بارے میں بتایا جاتا ہے کہ وہ غیر ملکی ہے۔تاہم مذکورہ جنگجو کی شناخت نہیں ہو سکی ۔ مارے گئے جنگجوئوں کی یاد میں پانپور، پلوامہ،ترال ، اونتی پورہ اور شوپیان میں مکمل ہڑتال کی وجہ سے معمولات  زند گی بری طرح متاثر رہی ہے جبکہ علاقے میں انٹر نیٹ سروس کو تیسرے روز بحال نہیں کیا گیا اور باہمولہ بانہال ٹرین سروس بھی بند رہی۔

دربہ گام پلوامہ میں کئی مقامات پر فورسز نے ناکے لگائے تھے جس کے دوران مذکورہ گائوں کے بالکل قریب ہی نوجوانوں اور فورسز میں شدید ٹکرائو ہوا۔مظاہرین نے فورسز پر اس وقت پتھرائو کیا جب انہیں روکا گیا جس کے واب میں فورسز نے پہلے ہوائی فائرنگ کی اور بعد میں براہ راست بھی فائرنگ کی جس کے نتیجے میں منظور احمد راتھر ساکن ٹہاب پلوامہ کے چہرے پر گولی لگی اور اسے نازک حالت میں پہلے پلوامہ ضلع اسپتال اور بعد میں سرینگر منتقل کیا گیا۔اس دوران پلوامہ ضلع ہیڈکوارٹر میں مکمل ہڑتال کے بیچ جب فورسز اہلکار واپس جارہے تھے تو ان پر پتھرائو کیا گیا جس کے جواب میں فورسز نے شلنگ کی جس کے بعد طرفین میں کافی وقت تک جھڑپیں ہوئیں۔ادھرشوپیان ضلع میں بھی مکمل ہڑتال رہی۔شاہد ٹاک کے مطابق صبح کے وقت اگرچہ مارکیٹ کھل گیا تاہم بعد میں نوجوانوں کی ٹولیاں سڑکوں پر نکل آئیں نعرے بازی کر کے وہاں سے گزرنے والی پولیس گاڑیوں پر زبردست پتھرائو کیا جس کی وجہ سے افرا تفری مچ گئی اور دُکانیں بند ہوگئیں۔ بٹہ پورہ چوک ،گول چکری اور علیالپورہ میں فورسز اور مظاہرین کے بیچ جھڑپوں کا سلسلہ کافی دیر تک جاری رہا۔پولیس فورسز نے مظاہرین کو منتشرکرنے لئے آنسو گیس کے گولے داغے ۔شوپیان میں بھی انٹر نیٹ سروس معطل رہی۔

 

 فردین اور منظورسپر دخاک

نماز جنازہ میں لوگوں کی بھاری شرکت

سی آر پی ایف کانسٹیبل

چاڑورہ میں سپرد لحد