۔10ویں جماعت کے امتحانی نتائج پانچ یاچھ روزبعد

 سری نگر//گزشتہ برس نومبر دسمبرمیں لئے گئے دسویں جماعت کے امتحانات کے نتائج پانچ یاچھ روزبعدظاہر کئے جائیں گے۔ کے این ایس  کے مطابق جوائنٹ سیکریٹری ایڈمنسٹریشن، پروفیسر اعجاز احمد نے کہا کہ اس سلسلے میں تمام عمل اور رسمی کارروائیوں کو مکمل کرنے میں کم از کم پانچ سے چھ دن لگیں گے۔جوائنٹ سکریٹری کا یہ بیان ان افواہوں کے بعدسامنے آیا ہے جن کے مطابق دسویں جماعت کے امتحانات کے نتائج کا اعلان ایک یا دو دن میں کیاجاناتھا۔جوائنٹ سیکرٹری نے کہا،’’یہ سچ نہیں ہے۔ میں طلباء گزارش کرتا ہوں کہ ایسی افواہوں پر یقین نہ کریں‘‘۔ انہوں نے کہا کہ نتائج کے اعلان کے بارے میں باضابطہ اعلان مناسب وقت پر کیا جائے گا اور طلباء کو اس بارے میں آگاہ کیا جائے گا۔واضح رہے کہ دسویں جماعت کا سالانہ امتحان گزشتہ سال 20نومبر کو شروع ہوا اور دسمبر کے پہلے ہفتے میں اختتام پذیر ہوا۔عہدیداروں کے مطابق تقریباً 80ہزارطلباء نے امتحان میں شرکت کی۔حکومت نے 2021کے سالانہ امتحان میں دسویں سے بارہویں جماعت کے طلباء کے لیے نصاب میں 30فیصد رعایت کا اعلان کیا تھا۔یہ نرمی کووِڈ – 19وباء کے پیش نظر دی گئی تھی اور یہ کشمیر اور جموں ڈویڑن کے طلباء کے علاوہ لداخ یوٹی کے طلباء پر بھی لاگو تھی۔