ہندوستان کو 36 رافیل طیارے 2022تک مل جائیں گے :وزیر دفاع

 نئی دہلی//فضائیہ کے لئے فرانس سے خریدے گئے 36رافیل جنگی طیارے 2022تک ہندوستان کو مل جائیں گے ۔وزیر دفاع نرملا سیتارمن نے جمعہ کو لوک سبھا میں رافیل مسئلے پر ہوئی بحث کے جواب میں کہاکہ پہلا طیارہ اس سال ستمبر میں آئے گا اور سبھی 36طیاروں کی فراہمی 2022تک پوری ہوجائے گی۔انہوں نے کہا کہ فرانس سے جدید ترین جنگی طیارے خریدنے کے لئے 2016میں ہوئے معاہدے میں یہ التزام کیاگیا تھا کہ تین سال میں پہلے طیارے کی فراہمی کی جائے گی۔اسی کے مطابق پہلا طیارہ آئندہ ستمبر میں ہمیں مل جائے گا اور آخری طیارہ 2022 میں فراہم ہوجائے گا۔وزیردفاع نے کانگریس پر قومی سلامتی کو نظرانداز کرنے کا الزام لگاتے ہوئے کہا کہ اس کی قیادت والی ترقی پسنداتحاد حکومت دس سال تک اس طیارے کی خرید کے معاہدے کے عمل کو پورا نہیں کرسکی۔وہیں ہم نے بات چیت کے عمل کو محض14ماہ میں پورا کرکے معاہدے پردستخط کردئے ۔یواین آئی۔