عظمیٰ نیوز ڈیسک
نئی دہلی//زوردار بارش کی وجہ سے ہماچل پردیش میں حالات بہت سنگین ہوگئے ہیں۔ پوری ریاست میں 338 سڑکیں بند ہوگئی ہیں۔ ریاستی شاہراہ کے ساتھ ساتھ کئی قومی شاہراہوں کے بند ہوجانے سے آمد و رفت پر زبردست منفی اثر پڑا ہے۔ موسلا دھار بارش کی وجہ سے ریاست میں آبی بحران پیدا ہونے کے ساتھ ساتھ بجلی سپلائی بھی بُری طرح متاثرہو گئی ہے۔ جہاں ایک طرف 116 آبی سپلائی منصوبے متاثر ہیں وہیں سینکڑوں ٹرانسفارمر ٹھپ پڑ گئے ہیں جس کی وجہ سے لوگوں کو زبردست پریشانی کا سامنا کرنا پڑ رہا ہے۔ راجدھانی شملہ میں حالات سب سے زیادہ سنگین بنے ہوئے ہیں۔ہماچل پردیش میں 4 قومی شاہراہ بند پڑی ہیں جبکہ شملہ میں 104 اور منڈی میں 71 سڑکوں پر بارش کی وجہ سے آمد و رفت کا سلسلہ منقطع ہو گیا ہے۔ بند راستوں کو دوبارہ کھولنے کیلئے کام کئے جا رہے ہیں یا رُوٹ کو ڈائیورٹ کر اس کے متبادل کی تلاش کی جا رہی ہے۔ راستوں کے بند ہوجانے سے ایچ آر ٹی سی کی بسوں کی آمد و رفت میں بھی رکاوٹ آئی ہے۔ میڈیا کے مطابق شملہ شہر اور اس کے دیہی علاقوں میں کئی بس رُوٹ فیل ہو چکے ہیں اور کئی گاڑیوں کو وقت پر پہنچنے میں تاخیر ہو رہی ہے۔ آمد و رفت کی خستہ صورت حال کے پیش نظر مسافروں اور سیاحوں کو کافی پریشانی اٹھانی پڑ رہی ہے۔ ایچ آر ٹی سی کو بھی زبردست مالی نقصان کا سامنا ہے۔ بجلی سپلائی متاثر ہونے کی وجہ سے کئی علاقوں میں تاریکی چھا گئی ہے۔دوسری طرف کنور میں گزشتہ روز ہوئی بارش کے بعد بادل پھٹنے سے ضلع کے ندی نالوں میں زبردست طغیانی ہے۔ یہاں جگہ جگہ لینڈ سلائڈ ہونے سے قومی شاہراہ سمیت رابطہ سڑک منقطع ہوگئے ہیں۔ جس سے لوگوں کی پریشانیوں میں اضافہ ہوگیا ہے۔ ستلج اور اسپیتی ندی کے سبگن کھاب اور ڈوگری کی پہاڑیوں پر بھی بادل پھٹے ہیں جس سے کھاب اور ڈوگری میں اونچائی والے راستے میں کثیر مقدار میں ملبہ اور پتھر گر گئے ہیں جس سے پوہ کاجا راستہ بُری طرح سے منقطع ہوگیا ہے۔ادھر گرو گرام میں اتوار کو پورے دن بارش کی وجہ سے کئی علاقوں میں پانی جمائو کا بڑا مسئلہ پیدا ہو گیا۔ دہلی گروگرام ایکسپریس وے کے نرسنگھ پور کھنڈ اور بسی اور گولف کورس ایکسٹینشن روڈ کے قریب کے علاقوں میں پانی کا زبردست جمائورہا۔ موسلادھار بارش سے گرو گرام کی سڑکیں پانی جمائو کی وجہ سے تالاب میں تبدیل ہوچکی ہیں۔ ہر طرف پانی ہی پانی دکھائی دے رہا ہے۔ پیدل چلنے والوں کو گھٹنوں تک پانی سے ہوکر گزرنا پڑ رہا ہے۔
افسران نے بتایا کہ دہلی کی طرف سے قومی شاہراہ 48، نرسنگھ پور چوک، ہیرو ہونڈا چوک، راجیو چوک، واٹیکا چوک، اِفکو چوک، سوہنا روڈ، بسئی، کھانڈسا روڈ اور پٹودی روڈ میں لوگوں کی کافی بھیڑ تھی۔ میونسپل کارپوریشن کی طرف سے علاقے میں پانی نکالنے کا کام کیا گیا۔اس وقت پورے ملک میں مانسون کی بارش جاری ہے۔ کئی علاقوں میں لوگوں کو گرمی سے راحت ملی ہے تو کئی علاقوں میں بارش کے قہر نے لوگوں کے لیے پریشانی کھڑی کردی ہے۔
