کپوارہ میں 3سالہ بچی کو مبینہ طور اغوا کرنے کی کوشش

کپوارہ//درگمولہ کپوارہ میں منگل کے روز اُ سوقت ایک غیر ریاستی خوانچہ فروش کو پولیس نے گرفتار کیا جب مبینہ طور پر وہ 3 سالہ معصوم بچی کو اغواء کرنے کی کوشش کررہا تھا ،جسے مقامی لوگوں نے ناکام بنا دیا ۔ ایک غیر ریاستی خوانچہ فروش ،جو بیڈ شیٹ اور دیگر کپڑے کے مصنوعات فروخت کرتا ہے ،محمد شفیع لون ساکنہ ماربل کالونی درگمولہ کپوارہ کے گھر میں داخل ہوا ۔معلوم ہوا ہے کہ گھر کے صحن میں مذکورہ شہری کی 3 سالہ بچی عارفیہ کھیل کود میں مصروف تھی اور غیر ریاستی خوانچہ فروش نے اس بچی کو بقول اہل خانہ اغوا ء کرکے وہاں سے فرار ہوگیا ۔مقامی لوگوں نے بتایا کہ بچی کے رونے اور چیخ وپکار سے اُسکی ماں کی توجہ اس جانب گئی ،جس نے پڑوس سے مدد طلب کی ۔کمسن بچی کی والدہ شاہینہ نے بتایاکہ سبھی افرادخانہ گھرکے اندرموجودتھے کہ اس دوران تین سالہ عارفہ کے چیخنے چلانے کی آوازسنائی دی ،اورہم سب دوڑے دوڑے گھرسے باہرآئے ۔خاتون کے بقول ہم نے دیکھاکہ ایک غیرریاستی خوانچہ فروش کمسن عارفہ کے ہاتھ رسی سے باندھنے کی کوشش کررہاتھا۔انہوں نے کہاکہ ہم نے بچی کواس اغواکارکے چنگل سے چھڑالیااورغیرریاستی بدمعاش کودبوچ لیاگیا۔مقامی لوگوں نے غیر ریاستی شخص کا تعاقب کیا اور کچھ دوری پر مبینہ اغواکار کو بچی سمیت دبوچ لیا ۔اس واقعہ کے بعد مقامی لوگوں نے پولیس کو مطلع کیا ،اور متعلقہ تھانے سے فوری طور پر پولیس کی ایک ٹیم وہاں پہنچی ،جس نے غیر ریاستی اغواکار کو حراست میں لیا ۔مقامی لوگوں نے بتایا کہ مبینہ اغوا کار نے اُن کے سامنے انکشاف کیا کہ وہ پورا ایک گروہ ہے اوراس کے گروہ میں چار دیگر افراد بھی ہیں ۔مبینہ اغوا کاری معاملے پر مقامی لوگوں نے سڑکوں پر نکل کر صدائے احتجاج بلند کی ۔انہوں نے ملوثین کیخلاف سخت سے سخت کارروائی کرنے کی مانگ کی ۔کپوارہ پولیس نے بتایا کہ مبینہ اغوا کار پولیس حراست میں ہے اور اس سے پوچھ تاچھ جاری ہے ۔پولیس نے بتایا کہ مقامی لوگوں نے بعض الزامات عائد کئے ہیں ،جنکی تحقیقات کے بعد سچائی سامنے آئیگی ۔