کٹھوعہ سانحہ:احتجاجی لہر جاری،متاثرہ کنبے کو انصاف فراہم کرنے کا مطالبہ

 ہیرانگر//تحصیل ہیرا نگر کے کوٹہ گائوں میں محمد یوسف پجوال کے صحن میں ایک پھٹا پرانا فٹ بال پڑا ہے ، جو لڑکی اس فٹ بال کے ساتھ کھیلا کرتی تھی وہ بے دردی سے وحشی درندوں کے ہاتھوں جنسی زیادتی کا شکار ہونے اور پھر بے رحمی سے قتل کئے جانے کے بعدیہاں سے کئی کلو میٹر دور قبر میں لیٹی ہوئی ہے ۔ اس آٹھ سالہ معصوم بچی کے والد کا تین کمروں پر مشتمل پختہ مکان مقفل ہے جہاں یہ کنبہ موسم سرما کے دوران رہائش رکھتا ہے ۔قریبی گائوں پٹہ کے لیاقت علی کی 14-15جنوری کو ہونے والی شادی کا ہاتھ سے تحریر کردہ دعوت نامہ بھی صحن میں پھڑپھڑا تا ہوا نظر آجاتا ہے ، یہ عین وہی وقت ہے جب محمد یوسف اپنی لاپتہ بیٹی کی تلاش میں سرگرداں تھا۔ یوسف کے گھر کے آس پاس سناٹا چھایا ہوا ہے ، قریب ترین بکروال کنبے کا مکان قریب ڈیڑھ کلو میٹر کی دوری پر ہے جہاں یوسف کا ایک رشتہ دار محمد جان رہتا ہے ۔ محمد جان کے گھر کے دروازہ پر ایک کتا پہرہ دے رہا ہے جو ہر اجنبی کو دیکھ کا بھونکتا ہے ۔ جب یہ نمائندے وہاں پہنچے تو انہیں گھر والوں سے کتے کے بندھے ہونے کی تصدیق کرنا پڑی۔ جان نے بتایا کہ اس کے دو بیٹے موسمی نقل مکانی کے سلسلہ میں پہاڑی علاقوں کی طرف نکل پڑے ہیں لیکن وہ بچوں اور خواتین کے ساتھ ابھی رکا ہوا ہے کیوں کہ اس کیلئے پہاڑوں پر سفر کرنا ممکن نہیں ہے ۔ ’’میرے بیٹے اس سال قبل از وقت ہی یہاں سے چلے گئے کیوں کہ ہمیں خوف تھا کہ انہیں فرضی معاملات میں پھنسا نہ لیا جائے، ہمارے ساتھ جانوروں سے بھی برا سلوک کیا جاتا ہے ‘۔جان نے بتایا کہ وہ 40سال قریب یہاں منتقل ہوئے تھے ، 8سالہ معصوم بچی کا قتل ان کی سمجھ سے بالا تر ہے ۔’’بکروالوں کے کل ملا کر 7کنبے یہاں آباد ہیں ، ہم ہزاروں لوگوں کیلئے کیوں کر خطرہ ثابت ہو سکتے ہیں؟‘‘اپنے پوتے پوتیوں کے ہمراہ چارپائی پر بیٹھے جان محمد نے استفسار کیا۔ جنوری میں جب 8سالہ بچی کی آبر و ریزی اور قتل ہونے کے بعد بکروالوں کے کنبے مسلسل خوف و دہشت کے سائے میں جی رہے ہیں۔ ’’مقامی سرپنچ کی قیادت میں ہونے والے مسلسل مظاہروں میں ہمارے خلاف نعرہ بازی کی جاتی رہی جس میں ہمیں یہاں سے نکال پھینکنے کی دھمکیاں دی جاری رہیں، ہم خود کو پوری طرح غیر محفوظ تصور کر رہے ہیں۔‘‘اس نے بتایا کہ ’دروازے پر بندھا کتا ہمیں جنگلی جانوروں سے تو بچا سکتا ہے لیکن ان انسانی شکل کے بھیڑیوں سے کون بچائے گا جنہوں نے ایک معصوم بچی کو بھی نہیں بخشا‘۔’’کرائم برانچ کیا ہے ؟ اور یہ سی پی آئی (سی بی آئی) کیا ہوتا ہے؟‘‘مقامی بی جے پی لیڈر کی طر ف سے تشکیل دی گئی ہندو ایکتا منچ کی مانگ کے بارے میں پوچھے جانے پر جان محمد نے لاعلمی اور معصومیت کا مظاہرہ کرتے ہوئے سوال کیا۔ 8سالہ متوفیہ کی یادیں 7سالہ سیفل سے لے کر 35سالہ شینہ کے دل میں پیوست ہیں۔ شینہ نے بتایا کہ’وہ اکثر ہمارے گھر آیا کرتی تھی جب بھی اسے کوئی کام ہوتا تھا۔ سیفل بتاتا ہے کہ ’’وہ جب بھی گھوڑوں کو پانی پلانے ادھر آتی تو میرے ساتھ کھیلتی تھی لیکن عرصہ سے وہ اس تالاب پر نہیں آئی کیوں کہ اسے مار دیا گیا ہے ۔‘‘

 

سرینگر//کٹھوعہ سانحہ کے خلاف بیرون ریاست کیرالہ میں ہڑتال کے دوران احتجاجی مظاہرے ہوئے جس دوران پولیس نے درجنوں احتجاجی مظاہرین کو حراست میں لیا گیا۔ ضلع کٹھوعہ میں پیش آئے آبروریزی اور قتل معاملے کے خلاف جہاں ریاست میں تنائو اور کشیدگی کا ماحول برقرار ہے اورزندگی کے مختلف شعبہ جات سے وابستہ لوگ اس شرمناک واقعہ کے خلاف صدائے احتجاج بلند کررہے ہیں وہیں سوموار کو بھارت کے شہر کیرالہ میں بھی واقعہ کے خلاف سخت احتجاج کیا گیا۔ اطلاعات کے مطابق کیرالہ میں  8سالہ بچی کی فرقہ پرستوں کے ہاتھوں آبروریزی اور قتل کو لے کر مکمل ہڑتال کی گئی جس دوران پورے شہر میں زندگی کی جملہ سرگرمیاں معطل رہی۔ احتجاج کے دوران کیرالہ میں دکانیں، تجارتی ادارے، تعلیمی ادارے، سرکاری و غیر سرکاری ادارے بند کرنے کے علاوہ سڑکوں سے ٹریفک مکمل طور پر غائب رہا۔ کیرالہ کی مشہورسیاسی جماعت ’سوشل ڈیموکریٹک پارٹی آف انڈیا‘ کے کارکنوں کی بڑی تعداد نے شہر کے مختلف علاقوں میں احتجاجی مظاہرے کئے اور آر ایس ایس اور بی جے پی کے خلاف نعرہ بازی کی۔ اس دوران مظاہرین نے مختلف علاقوں میں کھلے دکانات کو تالہ بند کروادیا اور سڑکوں پر رکاوٹیں کھڑی کرکے گاڑیوں کی آمدروفت مکمل طور روک دی۔ احتجاجی مظاہروں کو دیکھتے ہوئے کیرالہ پولیس نے مظاہرین کا تعاقب کرتے ہوئے سوشل ڈیموکریٹک پارٹی آف انڈیا سے وابستہ درجنوں کارکنان کو حراست میں لیا۔ اطلاعات کے مطابق احتجاج کے دوران سب سے زیادہ اثر ضلع کوزی کھوڑی، کنور، مالہ پورم، پالہ کڑ اور تیرووننتھ پورم میں دیکھنے کو ملا جو ذرائع کے مطابق سوشل ڈیموکریٹک پارٹی آف انڈیا کا گڑ مانے جاتے ہیں۔ 

 

کپوارہ/اشرف چرا غ /کپوارہ قصبہ میں کانگریس پارٹی کے کار کنو ں نے کٹھوعہ میں پیش آئے واقعہ کے خلاف مشعل بردار نکال کر زور دار احتجاج کیا اور مطالبہ کیا کہ اس شر مناک واقعہ میں ملوث مجرمو ں کو کڑی سے کڑی سزا دی جائے ۔پیر کی شام کو کانگریس پارٹی نے ضلع صدر حاجی محمد فاروق میر کی قیادت میں ایک مشعل بردار جلوس نکال کر کٹھوعہ میں 8سالہ بچی کی عصمت ریزی کے بعد قتل کے خلاف مطالبہ کیا کہ ملزمو ں کو کڑی سے کڑی سز ا دی جائیں ۔کانگریس صدر حاجی فاروق نے کہا کہ کشمیر میں انسانی حقوق کی خلاف ورزیو ں میں ہونے والا اضافہ اور جبر و دنیا بھر کے ضمیر کو جھنجوڑ کر رکھ دیا ۔انہو ں نے کٹھوعہ کیس میں وکلاء کی جانب سے مداخلت اور رکاوٹ کو اخلاقی دیوالیہ پن سے تعبیر کرتے ہوئے کہا کہ ان وکلاء کے خلاف بھی کاروائی ہونی چایئے جنہوں نے عدالت میں فرد جرم پیش کر نے پر پولیس کے کرائم برانچ کو روک دیا ۔انہو ں نے موجودہ سرکار پر الزام لگایا کہ وہ عوام کو تحفظ فراہم کرنے میں ناکام ہوچکی ہے اور یہی وجہ ہے کہ عوام میں موجودہ مخلوط سرکار کے خلاف صف آرا ہوچکے ہیں ۔انہو ں نے مطالبہ کیا کہ انصاف کی راہ میں رکاوٹ ڈالنے کے خلاف بھی کاروائی عمل میں لائی جائیں ۔