کولگام میں فوج کی جپسی کوحادثہ،1ہلاک3زخمی

سرینگر // دمہال ہانجی پورہ کولگام میں جمعہ کی صبح ایک سڑک حادثے میں 4 فوجی جوان زخمی ہوگئے،جن میں سے بعدازاں ایک زخموں کی تاب نہ لاکردم توڑبیٹھا۔معلوم ہواکہ ضلع کولگام کے علاقہ دمہال ہانجی پورہ میں جمعہ11بجے صبح فوج کی 9 آر آر کی ایک گاڑی اڑیجن بائی پاس کے نزدیک سڑک سے لڑھک کر نالہ ویشو میں جاگری جس میں موسلا دھار بارشوں کے باعث پانی کا بہاؤ بہت تیز تھا۔پولیس ذرائع نے بتایا کہ اس حادثے میں چار فوجی جوان زخمی ہوگئے جن کوفوری طورپر علاج و معالجے کیلئے سب ضلع ہسپتال دمہال ہانجی پورہ منتقل کیا گیا۔ذرائع کا کہنا ہے کہ زخمی جوانوں میں سے ایک کی حالت نازک تھی جس کو ضلع اسپتال کولگام منتقل کیا گیا تاہم دیگر تین فوجی جوانوں کی حالت مستحکم ہے۔ چوتھے فوجی جوان جس کوضلع اسپتال کولگام منتقل کیاگیا تھا،کی شناخت سپاہی 27سالہ سروج سربیتاکے بطورہوئی ہے ۔ بلاک میڈیکل افسر دمہال ہانجی پورہ ڈاکٹر شگفتہ سلام نے بتایا کہ سب ضلع ہسپتال میں تین فوجی جوانوں کو زخمی حالت میں لایا گیا جن کی حالت مستحکم ہے۔اُدھر میڈیکل سپرانٹنڈنٹ ضلع اسپتال کولگام ڈاکٹرمظفرزرگر نے بتایاکہ ایک زخمی ہوئے فوجی جوان کویہاں لایاگیا لیکن ابتدائی طبی معائنے کے بعداُس سے مردہ پایاگیا۔انہوں نے کہاکہ مذکورہ فوجی کوجب تک یہاں پہنچایاگیا،تب تک وہ راستے میں ہی دم توڑ چکاتھا۔اُدھر کولگام پولیس نے معاملہ درج کرکے تحقیقات شروع کردی ۔قابل ذکر ہے کہہ آڑیجن کے مقام سے دمحال ہانجی پورہ کی طرف ایک کم مسافت والاراستہ جاتا ہے  مگر آگے جاکر اس سڑک پر سفرکرنے والوں کو نالہ ویشوپر ایک ڈائیورشن کو عبور کرنا پڑتا ہے مگر موسم خراب ہوتے ہی نالہ ویشوکاتیزبہائواس ڈائیورشن کوبہا کے لے جاتا ہے جس کے سبب اس مقام پراکثر حادثے پیش آتے رہتے ہیں۔