سرینگر//پوری دنیا کو اپنی لپیٹ میں لینے والے ’کورونا وائرس‘ نے جہاں لوگوں کو تذبذب اور اضطراب میں مبتلاء کیا ہے ،وہیں معیشت پر بھی منفی اثرارت مرتب ہونے لگے ہیں۔احتیاطی اقدامات کے تحت ہر اتوار کو لالچوک میں سجنے والا ’سنڈے مار کیٹ‘ سرینگر میونسپل کارپوریشن کی ہدایت پر بند رہا تاہم چند ایک مقامات پر چھاپڑی فروشوں نے اپنی چھاپڑیاں سجا ئی تھیں۔سرینگر میونسپل کارپوریشن (ایس ایم سی )انتظامیہ نے لالچوک سے ہری سنگھ ہائی سٹریٹ تک لگنے والے سنڈے مارکیٹ کو بند کر دیا۔یہ قدم کورونا وائرس کے بڑھتے خدشات کے پیش نظر اٹھایا گیاہے۔لالچوک کے گردونواح میں ہر اتوار کے دن لگنے والے سنڈے مارکیٹ میں لوگوں کی بھیڑ خرید و فروخت کرنے کیلئے موجود ہوتی ہے۔سرینگر میونسپل کارپوریشن کے میئرجنید عظیم متو نے سنڈے مارکیٹ کو بند کرنے کے احکامات جاری کرتے ہوئے کہا کہ اسے کورونا وائرس کے خدشات کے پیش نظر احتیاطی طور پر یہ فیصلہ کیا گیاہے۔انہوں نے کہا کہ چونکہ اتوار کو لگنے والے اس مارکیٹ میں حد درجہ بھیڑ جمع ہوتی ہے، مناسب نہیں ہے کہ ان حالات میں جب کورونا وائرس کے پھیلائوکے خدشات بڑھ رہے ہوں تو یہاں بھیڑ اکٹھی ہوجائے۔(کے این ایس)
کوروناوائرس پھیلنے کا خدشہ | مصروف ترین سنڈے مارکیٹ بند رہا
