کمسن بچے کویرغمال بناناشرمناک حرکت:تاریگامی

سرینگر// سی پی آئی (ایم) کے ریاستی سیکرٹری محمد یوسف تاریگامی نے حاجن جھڑپ کے دوران 12سالہ کمسن طالب علم کو جنگجوئوں کی طرف سے یرغمال بنانے اور بعد میں جاں بحق کئے جانے کی کارروائی کی شدید الفاظ میں مذمت کی ۔ انہوں نے کہا کہ ہتھیار بند نوجوانوں کی طرف سے  شہری آبادی کو یرغمال بنانا بزدلی ہے اور اس طرح کے واقعات کی بیک زبان مذمت کی جانی چاہیے۔ سی پی آئی(ایم) کے ریاستی سکرٹری محمد یوسف تاریگامی نے شمالی کشمیر کے حاجن علاقے میں فوج اور جنگجوئوں کے درمیان ہوئی خونین معرکہ آرائی کے دوران جنگجو نوجوانوں کی طرف سے 12سالہ کمسن طالب علم عاطف کو یرغمال بنانے اور بعد میں جاں بحق کرنے کی کارروائی کی شدید ترین الفاظ میں مذمت کی۔ انہوں نے کہا کہ جھڑپ کے دو ران عام شہری کو یرغمال بنانا انتہائی مذموم اور شرمناک عمل ہے جس کی جتنی بھی مذمت کی جائے کم ہے۔ تاریگامی کا کہنا تھا کہ مسلح تصادم آرائیوں کے دوران شہری آبادی کو یرغمال بنانا بزدلی کی علامت ہے اور اس طرح کے واقعات کی تمام لوگوں کو متحدہ طور پر مذمت کرنی چاہیے۔انہوں نے کہا کہ اس ہیبت ناک واقعے نے پوری ریاست کو ہلاکے رکھ دیا ہے۔انہوں نے سوالیہ انداز میں کہا کہ جنگجوئوں نے ایک کمسن طالب علم کو کیونکر یرغمال بنایا ؟ عاطف نے کون سا گناہ کیا تھا؟ انہوں نے بتایا کہ جو اطلاعات موصول ہوئی اُن کے مطابق مکان میں چھپے بیٹھے جنگجوئوں نے عاطف کو باہر جانے کی اجازت نہیں دی اور جب فورسز اہلکاروں نے مکان کو بارودی مواد سے تباہ کرنے کی کوشش کی ،تو اس سے قبل ہی جنگجوئوں نے 12سالہ معصوم بچے کو ہلاک کردیا۔ تاریگامی کا کہنا تھا کہ 12سالہ عاطف ایسی موت کا حقدارنہیں تھا اور اب اس کے لواحقین کو عمر بھر کے لیے اس صدمے اور درد کو برداشت کرنا پڑے گا۔اس موقعے پرانہوں نے عاطف کے لواحقین کے ساتھ دلی تعزیت کا اظہار بھی کیا۔