سرینگر// وادی کشمیر میں دو روز تک معطل رہنے والی ریل خدمات ہفتہ کی صبح بحال کردی گئیں۔ یہ خدمات 22 جون کو جنوبی کشمیر کے ضلع پلوامہ کے کاکہ پورہ میں ایک مسلح تصادم کے دوران تین مقامی جنگجوؤں کی ہلاکت کے بعد بھڑک اٹھنے والے پرتشدد احتجاجی مظاہروں میں ایک عام نوجوان کے ہلاک ہونے کے بعد پیدا شدہ صورتحال کے پیش نظر احتیاطی اقدامات کے طور پر معطل کردی گئی تھیں۔ تاہم وادی میں جمعہ کو علیحدگی پسند قیادت کی طرف سے دی گئی احتجاج کی کال کے پیش نظر ریل خدمات کو مسلسل دوسرے دن بھی معطل رکھا گیا تھا۔ ریلوے کے ایک عہدیدار نے بتایا ’ ہم نے آج معمول کی سروس بحال کردی ہے‘۔ انہوںنے بتایا کہ ریل خدمات کی معطلی کا فیصلہ مقامی سیول و پولیس انتظامیہ کے مشورے پر لیا گیا تھا اور ان کی جانب سے گرین سگنل ملنے کے بعد ہی ریل خدمات کو آج بحال کردیا گیا۔ مذکورہ عہدیدار نے بتایا ’بڈگام۔ سری نگر سے جموں خطہ کے بانہال کے درمیان براستہ پلوامہ، اننت ناگ اور قاضی گنڈ چلنے والی ریل خدمات بحال کردی گئیں ‘۔ انہوں نے بتایا کہ اسی طرح وسطی ضلع بڈگام اور شمالی کشمیر کے ضلع بارہمولہ کی درمیان چلنے والی ریل خدمات بھی بحال کردی گئیں۔ یو این آئی
کشمیر میں ریل خدمات 2 روز بعد بحال
