کشتواڑ ضلع میں تعطیلات کے بعد تدریسی عمل کی بحالی اساتذہ نے کلاسوں کو دوبارہ شروع کرنے کی تیاری کو تقویت دی

 عظمیٰ نیوز سروس

کشتواڑ//ضلع کشتواڑ میں موسم سرما کی تعطیلات کے بعد اسکولوں کے کھلنے کے سلسلہ میں تیاریوں کو تقویت دی گئی ۔اساتذہ نے دو ماہ سے زیادہ کی تعطیلات کے بعد 1 مارچ 2024 کو طلباء کی واپسی سے پہلے تعلیمی اداروںکو تیار کیا ۔دور دراز کے کچھ اسکولوں کو برف سے ڈھکے احاطے کے چیلنج کا سامنا ہے جبکہ اساتذہ اور معاون عملے کی مشترکہ کوششوں کا مشاہدہ کرتے ہوئے برف کو تندہی سے صاف کیا تاکہ طلباء کی کلاسز دوبارہ شروع کرنے کیلئے ایک خوش آئند ماحول کو یقینی بنایا جا سکے۔ڈپٹی کمشنر ڈاکٹر دیونش یادو اور چیف ایجوکیشن آفیسر پرہلاد بھگت نے مختلف اسکولوں کا مکمل معائنہ کیا تاکہ باقاعدہ کلاسوں کی جلد بحالی کے لئے اداروں کی تیاریوں کا جائزہ لیا جا سکے۔معائنہ کے دوران، افسران نے ایک طویل وقفے کے بعد دوبارہ کلاسوں میں شامل ہونے والے طلباء کے لئے سیکھنے کا بہترین ماحول پیدا کرنے کی اہمیت پر زور دیا۔ انہوں نے اداروں کے سربراہوں (HOIs) پر زور دیا کہ وہ صفائی کو یقینی بنائیں اور کلاسوں کو آسانی سے شروع کرنے کے لئے ضروری انتظامات میں سہولت فراہم کریں۔سی ای او نے طلباء کے پہلے دن کو انٹرایکٹو اور حوصلہ افزا بنانے کی اہمیت پر زور دیا۔