کرناہ سیکٹر میں ایل او سی پر دراندازی کی کوشش ۔ 2ملی ٹینٹوں کی ہلاکت کا دعویٰ، کپوارہ میں اسلحہ و گولہ بارود ضبط ،ایک گرفتار

 اشرف چراغ

 

کپوارہ//شمالی ضلع کپوارہ کے کرناہ سیکٹر میں حد متارکہ کے نزدیک در اندازی کی کوشش ناکام بنانے کے دوران 2ملی ٹینٹوں کو ہلاکت کا دعویٰ کیا گیا ہے جبکہ کرالہ پورہ علاقہ میں فوج اور پولیس نے ایک مشتبہ شخص کو گرفتار کیا اور اس کی نشاندہی پر اسلحہ و گولہ بارود ضبط کیا ۔فوج کا کہنا ہے کہ جمعرات کو کرناہ سیکٹر میں حد متارکہ پر فوج نے دراندازوں کے ایک گرو پ کو مشکوک حالت میں دیکھا جو اس پار آنے کی کوشش میں تھا تاہم یہاں تعینات فوج نے علاقے کو گھیرے میں لیا اور تمام راستو ں کو بند کیا ۔

 

ملی ٹینٹوں نے فوج پر فائرنگ کی وور طرفین کے درمیان جھڑپ شروع ہوئی جس میں فوج نے دعویٰ کیا کہ مختصر جھڑپ کے دوران دو ملی ٹینٹوںکی ہلاکت ہوئی۔فوج نے پورے علاقہ کو گھیرے میں لیا اور تلاشی کارروائی شروع کی ۔مارے گئے ملی ٹینٹوں کے بارے میں سرکاری طور پر تصدیق نہیں ہوئی ۔سیکورٹی حکام کا کہنا ہے کہ دونوں ملی ٹینٹوں کی لاشیں ایل او سی کے نزدیک پڑی رہیں۔اس دوران کرالہ پورہ علاقہ میں فوج ،سرحدی حفاظتی فورس اور پولیس نے مشترکہ کارروائی کے دوان ایک مشتبہ شخص کو گرفتار کیا ۔پولیس بیان کے مطابق ایک مخصوص اطلاع پر پولیس تھانہ کرالہ پورہ ،فوج کے ناگا یونٹ اور سرحدی حفاظتی فورس کی 97بٹالین کے جوانو ں نے لون ہرے میں ایک ناکہ لگایا جس کے دوران ایک مشتبہ شخص مشتاق احمد لون ولد عبد الرحمن لون ساکن پاترو کیرن کو گرفتار کیا جو ملی ٹینٹوں کا ساتھی بتایا جاتاہے ۔پولیس کی پوچھ تاچھ کے دوران مشتاق نے اس بات کا انکشاف کیا کہ انہو ں نے اسلحہ و گولہ بارود ذخیرہ کیا ہے ۔پولیس نے اس کی نشاندہی پر اسلحہ و گولہ باورد ضبط کیا جس میں 2پستول،2میگزین ،10ہتھ گولے، 9.54ایم ایم رائونڈ شامل ہے ۔معاملہ کی نسبت پولیس تھانہ کرالہ پورہ میں ایک کیس زیر ایف آئی آر نمبر 32/2024زیر دفعہ 7/25LA,درج کر کے مزید تحقیقات شروع کی گئی ہے ۔