کرسمس تقریبات کی تیاریاں مکمل | تمام چرچ رنگ برنگی روشنیوں سے سجائے گئے، آج دعائیہ مجالس ہونگی

اشفاق سعید

سرینگر// وادی کے گرجا گھروں کوکرسمس کی تقریبات کے لیے تیارکیا گیا ہے۔ گرجا گھروں کو رنگ برنگی چمکتی ہوئی روشنیوں سے مزین کیا گیا ہے، اور کرسمس کیرول کی میٹھی دھنیں گرجا گھروں میں گونجتی ہوئی سنی جا سکتی ہیں۔تیاری کے طور پر گرجا گھروں کو کرسمس کے درختوں اور شاندار پھولوں سے سجایا گیاہے۔ کرسمس کا موسم سری نگر کی کمیونٹی کے لیے خوشی اور مسرت پیش کرتا ہے۔ خاندان گرجا گھروں میں اس تقریب کی منصوبہ بندی کے لیے جمع ہوتے ہیں۔ سرینگر کے گرجا گھر سال کے اس منفرد وقت کی تقریبات میں شرکت کے منتظر رہتے ہیں۔چرچ کے پادری نے تیاریوں کے بارے میں کہا، “ہم نے یکم دسمبر کو جشن شروع کیا تھا اور اب یہ تقریباً مکمل ہو چکا ہے، ہمیں چرچ کے ہر کام میں لوگوں سے بہت مدد ملتی ہے، ہزاروں کی تعداد میں عقیدت مند یہاں دعا اور کرسمس کی تقریبات کے لیے آتے ہیں، اس پرمسرت موقع پر، میں چاہتا ہوں کہ دنیا بھر کے لوگ امن اور ہم آہنگی برقرار رکھیں۔”وادی میں کرسمس کا جشن زوروں پر ہے۔ وادی کے کاریگر کرسمس سے پہلے کاغذ کی خصوصی گیندیں اور دیگر تحفے کی اشیا بنانے میں مصروف ہیں۔یہ کاریگر خصوصی گیندیں، سانتا کلاز، ستارے، ہلال، چوڑیاں اور دیگر تحائف کی اشیا بنانے میں مصروف ہیں جنہیں لوگ تقسیم کر کے اپنے گھروں اور گرجا گھروں میں سجا تے ہیں۔مسیحی فرقے کے لوگ کرسمس کا تہوار جوش و خروش سے منا رہے ہیں اور وادی کے کاریگروں کی بنائی ہوئی ایسی خوبصورت کاغذی مصنوعات کو بڑے پیمانے پر استعمال کر رہے ہیں۔کرسمس دنیا کا سب سے بڑا تہوار ہے اور اسے جموں کشمیر میں بھی مذہبی عقیدت کیساتھ منایا جاتا ہے۔مولانا آزاد روڈ ،چرج لین سونہ وار، بارہمولہ اور گلمرگ میں گرجا گھروں کو شاندار طریقے سے سجایا گیا ہے۔آج بروز پیر، گرجا گھروں میں دعائیہ مجالس منعقد ہونگیں جس میں جموں کشمیر کیلئے امن و آشتی کیلئے خصوصی دعائیں کی جائیں گی۔دعائیہ مجالس میں مسیحی برادری کے لوگ سبھی حصہ لیں گے اور بعد میں ایک دوسرے کو مبارک باد پیش کریں گے۔