عظمیٰ نیوزسروس
بھوماگ (کٹرہ)//مرکزی وزیر جتیندر سنگھ نے منگل کے روز جموں و کشمیر کو ریاست کا درجہ بحال کرنے کے کانگریس کے دعوے کو “جعلی بیانیہ” کے طور پر مسترد کرتے ہوئے کہا کہ وزیر اعظم نریندر مودی نے پہلے ہی وعدہ کیا ہے کہ انتخابات کے بعد ریاست کا درجہ بحال کیا جائے گا۔انہوںنے کہا ’’ کانگریس کے منشور میں کوئی اعتبار نہیں ہے اور لوگ اسے سنجیدگی سے نہیں لیں گے۔ انہوں نے ریاست کا درجہ مانگنا شروع کر دیا ہے جو کہ ایک فرضی بیانیہ ہے کیونکہ پی ایم پہلے ہی کہہ چکے ہیں کہ انتخابات کے بعد ریاست کا درجہ بحال کیا جائے گا۔ کانگریس اور نیشنل کانفرنس کا خیال ہے کہ وہ ایک غلط بیانیہ تیار کریں گے کہ ریاست ان کے دباؤ کی وجہ سے بحال ہوئی ہے۔ لیکن یہ کام نہیں کرے گا‘‘۔ جتیندر سنگھ نے کہا کہ نیا بنایاگیا”شری ماتا ویشنو دیوی” اسمبلی حلقہ “مقدس عقیدے” کی عکاسی کرتا ہے جسے کانگریس نے پچھلی کئی دہائیوں سے نظر انداز کیا ہے۔شری ماتا ویشنو دیوی حلقہ کے بھوماگ علاقے میں بی جے پی کے عوامی جلسوں کی ایک سیریز سے خطاب کرتے ہوئے ڈاکٹر جتیندر سنگھ نے کہا کہ برسوں سے اس علاقے کے لوگ ایک ساتھ حقیقی مطالبات کر رہے تھے لیکن یکے بعد دیگرے کانگریس اور اس کے اتحادیوں کی سربراہی میں حکومتیں ہمیشہ لاتعلق رہتی تھیں۔انہوںنے کہا کہ 2014میں نریندر مودی کے وزیر اعظم کے طور پر اقتدار سنبھالنے کے بعد ہی کٹرہ اور مندرکو وہ توجہ ملنا شروع ہوئی جس کے وہ مستحق تھے۔ انہوں نے یاد دلایا کہ جب 2013 میں بی جے پی نے نریندر مودی کو اپنا وزیر اعظم امیدوار قرار دیا تھا، تو موخرالذکر نے اپنی ملک گیر انتخابی مہم وشنو دیوی کی عبادت گاہ سے شروع کی تھی۔ انہوں نے یاد کیاکہ 2014میں وزیر اعظم بننے کے فوراً بعد، نریندر مودی کے ابتدائی اہم پروگراموں میں سے ایک کٹرہ ریلوے اسٹیشن کا افتتاح تھا۔ ڈاکٹر جتیندر سنگھ نے کہا کہ یہ صرف پچھلے 10 سالوں میں ہوا ہے کہ کٹرا کو ملک کے 10 آئیکن مقامات میں سے ایک قرار دیا گیا تھا اور اسے ترقی کے لیے خصوصی فنڈنگ کے لیے قومی پرساد (پیلگریمیج ریجوینیشن اینڈ اسپرچوئل اگمنٹیشن ڈرائیو) اسکیم میں شامل کیا گیا تھا۔ا نہوں نے کہاکہ یہ صرف مودی حکومت کے تحت ہی ہے کہ مندر پر درشن اور سفر کے لیے نئی سہولیات فراہم کی گئی ہیں اور دنیا بھر سے آنے والے عقیدت مندوں کی سہولت کے لیے جدید ترین ٹیکنالوجی کا استعمال کیا جا رہا ہے۔انہوں نے مزید کہا کہ کٹرا-دہلی ایکسپریس روڈ کوریڈور بھی جلد مکمل ہونے والا ہے۔ڈاکٹر جتیندر سنگھ نے کہا، وزیر اعظم مودی نے کٹرہ اور آس پاس کے علاقوں کو وہ احترام دیا ہے جس کے وہ مستحق ہیں اور یہ مودی کی ذاتی مداخلت تھی جس نے شری ماتا ویشنو دیوی کٹرا ریلوے اسٹیشن تک ایک نہیں بلکہ دو وندے بھارت ٹرینوں کو متعارف کرایا ۔انہوں نے کہا کہ ماتا ویشنو دیوی کے آشیرواد سے بہت جلد وادی کشمیر جانے والی ٹرین دنیا کے بلند ترین ریلوے پل کو عبور کرتے ہوئے یہاں سے گزرے گی۔
