ڈاکٹرس ایسوسی ایشن کا مطالبہ

سرینگر//کووڈ –  19ویکسین کے خلاف غلط پروپگنڈاکرنے والوں اورسوشل میڈیا پر اس سے متعلق غلط جانکاری فراہم کرنے والوںکے خلاف سخت کارروائی عمل میںلانے کا مطالبہ کرتے ہوئے ڈاکٹرس ایسوسی ایشن کشمیرنے کہا ہے کہ ٹیکہ کاری ہی ایک راستہ ہے جس سے ہمیں اس وبائی وائرس سے نجات مل سکتی ہے ۔ سی این آئی کے مطابق ڈاکٹرس ایسوسی ایشن کشمیر نے کہا ہے کہ عالمی وبائی وائرس کوروناسے ہمیں صرف اور صرف ویکسین سے ہی نجات مل سکتی ہے اور اسی سے اس مہلک وائرس سے نجات مل سکتی ہے ۔ ڈاکٹرس ایسوسی ایشن کے صدر ڈاکٹر نثارالحسن نے کہا کہ معمولات زندگی کو پٹری پر پھر سے اگر لانا ہے تو زیادہ سے زیادہ لوگوںکو ویکسین لینا ہوگا۔ انہوںنے کہا کہ جس رفتار سے ہم ویکسین لیں گے ،اسی قدر جلد ہی ہم اپنی معمول زندگی گزارنے کے اہل ہوں گے ۔ اگر لوگ معمول کے مطابق اپنا کاروبار چلانا چاہتے ہیں۔ بچوں کو پھر سے سکول بھیجنا چاہتے ہیں اور کھیل کود کی سرگرمیوں کو دوبارہ پہلے کی طرح سے شروع کرنا چاہتے ہیں تو ہمیں چاہئے کہ ہم جلد سے جلد ویکسین لیں ۔ ڈاکٹرس ایسوسی ایشن کے صدر نے کہا کہ کووڈ ویکسین ایک بڑا تحفہ ہے اور سائنس نے انسانیت کی ایک اور مثال پیش کی ۔ انہوںنے کہاکہ یہ ایک تاریخ ہے کہ ایک برس سے کم کے عرصے میں ہی اس عالمی وبائی بیماری کے خلاف ایک موثر اور کامیا ب ویکسین تیار کیا گیا ہے اور یہ عالم انسانیت کے حق میں بہت بڑی کامیابی ہے ۔ ڈاکٹر نثارالحسن نے کہا کہ اس ویکسین سے ایک تو اس وبائی بیماری پر قابو پایا جاسکتا ہے دوسرا اس سے اموات بھی کم ہوں گی ۔ ان کا مزید کہنا ہے کہ ہم نے ’’چیچک‘‘پولیو، اور دیگر بیماریاں بھی دیکھی ہیں تاہم کوروناوائرس سے سب مہلک ثابت ہوئی۔ اس وائرس میں کروڑوں لوگ مبتلاء ہوئے جبکہ لاکھوں کی تعداد میں اموات بھی ہوئی ہیں۔تاہم ویکسین کی تیاری کے بعد لوگوںنے راحت کی سانس لی ہے ۔ ٹیکہ لینے سے لوگ سخت بیمار ہونے سے بھی بچ جائیں گے اور  مہلک وائرس سے بھی محفوظ رہیں گے ۔ انہوںنے کہاکہ لوگوںمیں اس حوالے سے بھروسہ پیداکرنے کی ضرورت ہے۔ ڈاک صدر نے کہا کہ جموں کشمیر میں ہزاروں کی تعدادمیں ہیلتھ ورکروںنے ویکسین لیا ہے اور وہ بالکل تندرست ہیں۔ اس لئے اس سلسلے میںکسی بھی غلط فہمی کا شکار ہونے کی ضرور ت نہیں ہے ۔ ڈاکٹر نثارالحسن نے انتظامیہ پر زور دیا ہے کہ وہ ایسے عناصر کے خلاف کریک ڈاون کریںجو ویکسین کے خلاف غلط پروپگنڈا کررہے ہیں اور لوگوںمیں خوف پھیلا رہے ہیں ۔ انہوں نے کہاکہ ویکسین سے ہی ہم عالمی وبائی وائرس سے نجات حاصل کرسکتے ہیں۔