پی ایل او حماس سمیت تمام فلسطینیوں کی نمائندہ

 عظمیٰ نیوزڈیسک

غزہ// فلسطین لبریشن آرگنائزیشن کی ایگزیکٹو کمیٹی کے ایک رکن احمد المجدلانی نے بتایا کہ پی ایل او تنظیم حماس سمیت تمام فلسطینیوں کی نمائندگی کرتی ہے۔ یہ بیان اس وقت سامنے آیا جب حماس نے ماسکو میں اجلاس کے فوراً بعد کہا کہ روسی دارالحکومت میں فلسطینی دھڑوں کے اجلاس نے اس بات کی تصدیق کی ہے کہ پی ایل او فلسطینیوں کی جائز نمائندہ تنظیم ہے۔العربیہ کے مطابق حماس نے ایک بیان میں زور دیا کہ اجلاس میں مثبت اور تعمیری جذبہ غالب رہا۔ اس بات پر اتفاق کیا گیا کہ یہ ملاقاتیں مذاکرات کے آئندہ دوروں میں ایک جامع قومی اتحاد تک پہنچنے کے لیے جاری رہیں گی۔ اس میں تمام فلسطینی قوتیں اور دھڑے شامل ہوں گے۔ فلسطین لبریشن آرگنائزیشن فلسطینی عوام کی واحد جائز نمائندہ ہے۔اس ہفتے کے آغاز میں فلسطینی وزیر اعظم محمد اشتبہ نے حکومت سمیت استعفی دے دیا تھا۔ اب توقع کی جارہی ہے فلسطینی اتھارٹی محمد مصطفیٰ کو ان کے معاشی خدمات کی تاریخ کی وجہ سے اگلی حکومت کی تشکیل دینے کے لیے آگے لا رہی ہے۔