یو این آئی
نئی دہلی//سپریم کورٹ نے میڈیکل کالج گریجویشن کے لیے 5 مئی کو منعقد ہونے والے قومی اہلیت کے ساتھ داخلہ ٹیسٹ (NEET) 2024 میںمبینہ طور پر امتحان سے قبل سوالیہ پرچہ عام ہونے (پیپر لیک) سے متعلق گڑبڑی اور دھوکہ دہی کے الزام والی عرضیوں کے پیش نظر داخلے سے متعلق کاؤنسلنگ کے عمل پر روک لگانے سے منگل کو انکار کردیا۔ لیکن اس معاملے میں نیشنل ٹیسٹنگ ایجنسی (این ٹی اے ) کو نوٹس جاری کیا اور اس سے جواب طلب کیا۔جسٹس وکرم ناتھ اور جسٹس احسن الدین امان اللہ کی تعطیلاتی بنچ نے کہا کہ شیوانگی مشرا اور دیگر کی طرف سے دائر درخواستوں پر کئی سوالات اٹھائے گئے ہیں۔ امتحان کا تقدس برقرار رکھا جانا چاہیے ۔ عدالت عظمیٰ نے امتحان کا انعقاد کرنے والے ادارے این ٹی اے سے جواب طلب کرتے ہوئے کہا کہ وہ اس معاملے کی اگلی سماعت 8 جولائی کو کرے گی۔تاہم بنچ نے درخواست گزاروں کی زبانی درخواست پر کونسلنگ کے عمل پر روک لگانے سے انکار کر دیا۔درخواست گزاروں کی طرف سے پیش ہونے والے ایڈوکیٹ میتھیوز جے نیڈم پارا نے کہا کہ وہ نیٹ امتحان کے پیپر لیک ہونے کی خبر سن اندر تک ہل گئے ۔ وہ بہت زیادہ تناؤ اور پریشانی میں ہے کیونکہ انہوں نے اور اس کے خاندان کے افراد نے ایک دن میڈیکل پریکٹیشنر بننے کا خواب دیکھا تھا۔عدالت سے مداخلت کی درخواست کرتے ہوئے ، انہوں نے کہا کہ این ٹی اے نے پٹنہ، بہار کے شاستری نگر پولیس اسٹیشن میں درج ایف آئی آر کے پس منظر میں متعلقہ مختلف ایجنسیوں کی جاری تحقیقات مکمل ہونے سے پہلے ہی پیپر لیک کیس میں مبینہ ملزمان کو کلین چٹ دیتے ہوئیے اپنا خود کا سرکلر/نوٹیفکیشن شائع کردیا ہے ۔بنچ نے کہا کہ ہم کونسلنگ کو نہیں روکیں گے ، اگر آپ مزید بحث کریں گے تو ہم اسے مسترد کر دیں گے ۔
